ന്യൂഡല്‍ഹി: രാജ്യത്ത് പുരോഗതിയും ആഭ്യന്തര വളര്‍ച്ചയും ഉണ്ടാകണമെങ്കില്‍ ഇറക്കുമതി കുറയ്ക്കണമെന്ന് കേന്ദ്ര ഗതാഗത മന്ത്രി നിതിന്‍ ഗഡ്കരി. രാജ്യത്തെ ചെറുകിട, സൂഷ്മ വ്യവസായ മേഖലയില്‍ നിന്ന് അതിന് വേണ്ട ഉല്‍പാദനം ഉണ്ടായാല്‍ ഇറക്കുമതി കുറയ്ക്കാനാകുമെന്നും ഇതിന് വേണ്ടിയുള്ള പദ്ധതികള്‍ സര്‍ക്കാര്‍ ആസൂത്രണം ചെയ്യുകയാണെന്നും മന്ത്രി പറഞ്ഞു.
രാജ്യത്തെ ഗ്രാമങ്ങള്‍, ചെറു പട്ടണങ്ങള്‍, വന്‍ നഗരങ്ങള്‍ എന്നിവിടങ്ങളില്‍
ഒരുപോലെ ചെറുകിട വ്യവസായ മേഖലയില്‍ കൂടുതല്‍ തൊഴിലവസരങ്ങള്‍ സൃഷ്ടിക്കും. ഇത് രാജ്യത്ത് കൂടുതല്‍ തൊഴില്‍ അവസരങ്ങള്‍ സൃഷ്ടിക്കാനും അതുവഴി രാജ്യത്തെ സാമ്പത്തിക വളര്‍ച്ച ത്വരിതപ്പെടുത്താനുമാണ് സൂഷ്മ, ചെറുകിട, ഇടത്തരം വ്യവസായ മന്ത്രാലയം ലക്ഷ്യമിടുന്നതെന്നും അദ്ദേഹം മാധ്യമങ്ങളോട് പറഞ്ഞു. രണ്ടാമതും രാജ്യത്ത് അധികാരത്തില്‍ വന്ന മോഡി സര്‍ക്കാരിന്റെ സൂഷ്മ, ചെറുകിട, ഇടത്തരം വ്യവസായ മേഖലയോടുള്ള നയം വ്യക്തമാക്കുന്നതാണ് നിതിന്‍ ഗഡ്കരിയുടെ മന്ത്രിയായി ചുമതലയേറ്റെടുത്ത ശേഷമുളള ആദ്യ പ്രതികരണം.
Discussion about this post