മുംബൈ: പ്രധാനമന്ത്രി നരേന്ദ്ര മോഡിയുടെ മേഘസിദ്ധാന്തത്തിന് വന്‍ ട്രോളുകളാണ് ഇപ്പോള്‍ സമൂഹമാധ്യമങ്ങളില്‍ നിറയുന്നത്. വാര്‍ത്താ ചാനലായ ന്യൂസ് നേഷന് മോഡി നല്‍കിയ അഭിമുഖത്തിലാണ് മേഘസിദ്ധാന്തത്തെ കുറിച്ച് അദ്ദേഹം വാചാലനായത്. ഇതോടെ മോഡിയെ സോഷ്യല്‍മീഡിയ ഏറ്റെടുത്തിരിക്കുകയാണ്. ട്രോള്‍ മഴയാണ് ഇപ്പോള്‍ ഓരോ പരാമര്‍ശങ്ങള്‍ക്കും കിട്ടുന്നത്. ഇപ്പോള്‍ മോഡിയെ ട്രോളി ബോളിവുഡ് താരവും കോണ്‍ഗ്രസ് സ്ഥാനാര്‍ത്ഥിയുമായ ഊര്‍മിള മണ്ഡോദ്കര്‍ ആണ് രംഗത്ത് വന്നിരിക്കുന്നത്.
വളര്‍ത്തുനായയ്ക്കൊപ്പമുള്ള ചിത്രത്തിന് രസകരമായ കുറിപ്പ് നല്‍കിയാണ് ഈര്‍മിള മോഡിയെ ട്രോളിയിരിക്കുന്നത്. ട്വിറ്ററിലൂടെയായിരുന്നു പരിഹാസം. ‘മേഘങ്ങളില്ലാത്ത തെളിഞ്ഞ ആകാശത്തിന് ദൈവത്തിന് നന്ദി, എന്റെ പ്രിയപ്പെട്ട റോമിയോയുടെ ചെവികള്‍ക്ക് കൃത്യമായി റഡാര്‍ സിഗ്നലുകള്‍ പിടിച്ചെടുക്കാനാവുന്നുണ്ട്’ എന്നായിരുന്നു ഊര്‍മിളയുടെ ട്വീറ്റ്. സംഭവം ഇതിനോടകം സമൂഹമാധ്യമങ്ങളില്‍ നിറഞ്ഞു കഴിഞ്ഞു. മുംബൈ നോര്‍ത്ത് ലോക്സഭാ മണ്ഡലത്തില്‍ നിന്ന് മത്സരിക്കുന്ന ഊര്‍മിള നേരത്തെ മോഡി ബയോപികിനെ പരിഹസിച്ചും രംഗത്തെത്തിയിരുന്നു.
ഇതിനു പിന്നാലെയാണ് മേഘസിദ്ധാന്തത്തെ ട്രോളി രംഗത്ത് വന്നിരിക്കുന്നത്. ബലാക്കോട്ട് ആക്രമണത്തിന് തയ്യാറെടുക്കുമ്പോള്‍ മഴയും കാര്‍മേഘങ്ങളുമുണ്ടായിരുന്നത് വ്യോമസേനയെ ആശങ്കയിലാക്കിയിരുന്നു. എന്നാല്‍, പാക് റഡാറുകളില്‍ നിന്ന് വിമാനങ്ങളെ കാര്‍മേഘങ്ങള്‍ മറയ്ക്കുമെന്ന് താന്‍ സേനയ്ക്ക് ആത്മവിശ്വാസം പകര്‍ന്നെന്നും അതിനെ തുടര്‍ന്നാണ് ആക്രമണം നടത്തിയതെന്നുമായിരുന്നു അഭിമുഖത്തില്‍ മോഡി പറഞ്ഞത്. ഇതാണ് വിമര്‍ശനങ്ങള്‍ക്കും പരിഹാസങ്ങള്‍ക്കും വഴിവെച്ചത്.
Thank God for the clear sky and no clouds so that my pet Romeo’s ears can get the clear RADAR signals 🤣 pic.twitter.com/lbgtmIo59L
— Urmila Matondkar (@OfficialUrmila) May 13, 2019
Discussion about this post