ന്യൂഡല്ഹി: പ്രധാനമന്ത്രി നരേന്ദ്ര മോഡി ബോളിവുഡ് താരം അക്ഷയ് കുമാറുമായി നടത്തിയ അഭിമുഖമായിരുന്നു കഴിഞ്ഞ ദിവസം സോഷ്യല് മീഡിയ ചര്ച്ച ചെയ്ത പ്രധാന വിഷയം. ഇപ്പോഴിതാ മോഡിയുടെ അഭിമുഖത്തെ പരിഹസിച്ച് കോണ്ഗ്രസും രംഗത്തെത്തിയിരിക്കുകയാണ്. ബോളിവുഡ് താരമായ അക്ഷയ് കുമാറിനേക്കാള് മികച്ച നടനാകാനാണ് മോഡി ശ്രമിക്കുന്നതെന്നാണ് കോണ്ഗ്രസ് മോഡിയുടെ അഭിമുഖത്തെ പരിഹസിച്ചത്. മെയ് 23 ന് ജനങ്ങളാല് തള്ളപ്പെടാന് പോകുന്ന ഒരു ‘പരാജയപ്പെട്ട രാഷ്ട്രീയക്കാരന്’ ബോളിവുഡില് പകരം ജോലി തേടുന്നതായാണ് തോന്നുന്നതെന്നും കോണ്ഗ്രസ് പരിഹസിച്ചു.
നേരത്തേ പ്രിയങ്ക ഗാന്ധിയും മോഡിയുടെ ഈ അഭിമുഖത്തെ പരിഹസിച്ച് രംഗത്തെത്തിയിരുന്നു. മോഡി സംസാരിക്കേണ്ടത് സിനിമാ താരങ്ങളോടല്ല മറിച്ച് കര്ഷകരോടാണ് എന്നാണ് പ്രിയങ്ക ഇതിനെ കുറിച്ച് പ്രതികരിച്ചത്. ഇന്നലെയാണ് അക്ഷയ് കുമാറുമൊത്തുള്ള മോഡിയുടെ അഭിമുഖം ചാനലുകള് സംപ്രേക്ഷണം ചെയ്തത്. രാഷ്ട്രീയമല്ലാത്ത ഒരു തുറന്ന സംഭാഷണം മാത്രമാണിതെന്നായിരുന്നു വിവരണം.
ഈ അഭിമുഖത്തിനെതിയാണ് കോണ്ഗ്രസ് ഇപ്പോള് രംഗത്തെത്തിയിരിക്കുന്നത്. ‘വലിയ വിജയങ്ങള് കൈവരിച്ച എല്ലാവരും ഇഷ്ടപ്പെടുന്ന ഒരു മികച്ച നടനാണ് അക്ഷയ് കുമാര്. എന്നാല് രാജ്യത്തിന്റെ സമ്പദ് വ്യവസ്ഥയെ തന്നെ താറുമാറാക്കി തൊഴില് അവസരങ്ങള് ഇല്ലാതാക്കിയ സാധാരണക്കാരുടെയും കര്ഷകരുടെയും ജീവിതം നരകതുല്യമാക്കിയ ഒരു പരാജയപ്പെട്ട രാഷ്ട്രീയക്കാരന് ഇപ്പോള് അദ്ദേഹത്തെക്കാള് മികച്ച നടനാകാനാണ് ശ്രമിക്കുന്നത്’ എന്നായിരുന്നു കോണ്ഗ്രസ് വക്താവ് രണ്ദീപ് സുര്ജെവാല ഇതിനെ കുറിച്ച് പ്രതികരിച്ചത്.
Discussion about this post