ബെഗുസരായി: റോഡ് ഷോയ്ക്കിടെ ജെഎന്‍യു യൂണിയന്‍ മുന്‍ പ്രസിഡന്റും ബിഹാറിലെ ബെഗുസരായി മണ്ഡലത്തില്‍ സ്ഥാനാര്‍ത്ഥിയുമായ കനയ്യകുമാറിനു നേരെ കരിങ്കൊടി. ഇതേ തുടര്‍ന്ന് മണ്ഡലത്തില്‍ സംഘര്‍ഷവും ഉണ്ടായി. സിപിഐ സ്ഥാനാര്‍ത്ഥിയാണ് കനയ്യകുമാര്‍. ഇദ്ദേഹത്തിന്റെ അനുയായികളും പ്രദേശവാസികളായ ഒരു സംഘവും തമ്മിലാണ് സംഘര്‍ഷം ഉണ്ടായത്.
പ്രദേശവാസികളായ ഒരു സംഘം യുവാക്കള്‍ ബെഗുസരായി മണ്ഡലത്തിലെ ഗദ്പുര ബ്ലോക്കിലെ കൊറയ് ഗ്രാമത്തില്‍ നടന്ന റോഡ് ഷോയ്ക്കിടെയാണ് കനയ്യകുമാറിനെതിരെ കരിങ്കൊടി ഉയര്‍ത്തി മുദ്രാവാക്യം വിളികളുമായി എത്തിയത്. സിപിഐ പ്രവര്‍ത്തകര്‍ ഇത് ചോദ്യം ചെയ്തു. ഇതാണ് സംഘര്‍ഷമുണ്ടാകാന്‍ കാരണമായത്.
ഉടന്‍ സംഭവ സ്ഥലത്ത് പോലീസ് സംഘം എത്തുകയും സ്ഥിതിഗതികള്‍ നിയന്ത്രണ വിധേയമാക്കുകയും ചെയ്തു. കനയ്യകുമാര്‍ ബെഗുസരായില്‍ മത്സരിക്കുന്നത് കേന്ദ്ര മന്ത്രിയും മുതിര്‍ന്ന ബിജെപി നേതാവുമായ ഗിരിരാജ് സിങിനെതിരായാണ്.
Discussion about this post