ചെന്നൈ: ലോക്സഭാ തെരഞ്ഞെടുപ്പിനായി രാജ്യം ഒരുങ്ങിയിരിക്കുകയാണ്. പലയിടങ്ങളിലും കഴിഞ്ഞ ദിവസം തെരഞ്ഞെടുപ്പ് നടക്കുകയും ചെയ്തു. ഈ അവസരത്തിലാണ് തമിഴകത്തിന്റെ മക്കള് സെല്വന് വിജയ് സേതുപതി നടത്തിയ ഒരു പ്രസംഗം വൈറലായിരിക്കുന്നത്. മതവും ജാതിയും പറഞ്ഞ് വോട്ടു ചോദിക്കുന്നവര്ക്ക് ഒരിക്കലും വോട്ട് ചെയ്യരുതെന്നാണ് വിജയ് സേതുപതി പറഞ്ഞത്.
‘പ്രിയപ്പെട്ടവരെ, നമ്മള് വോട്ട് ചെയ്യുമ്പോള് നോക്കി ചെയ്യണം..സൂക്ഷിച്ച് വോട്ടുചെയ്യണം. നമ്മുടെ നാട്ടിലൊരു പ്രശ്നം, നമ്മുടെ കോളേജിലൊരു പ്രശ്നം, നമ്മുടെ സുഹൃത്തിനൊരു പ്രശ്നം, അല്ലെങ്കില് നമ്മുടെ സംസ്ഥാനത്തിനൊരു പ്രശ്നം എന്ന് പറയുന്നരോടൊപ്പം വേണം നമ്മള് നില്ക്കാന്. അല്ലാതെ നമ്മുടെ ജാതിക്കൊരു പ്രശ്നം, നമ്മുടെ മതത്തിനൊരു പ്രശ്നം എന്ന് പറയുന്നവരോടൊപ്പം ഒരിക്കലും നില്ക്കരുത്. ഇങ്ങനെ പറയുന്നവരൊക്കെ എല്ലാം ചെയ്ത് കഴിഞ്ഞിട്ട് പോലീസ് കാവലില് സുരക്ഷിതരായിരിക്കും. ഒടുവില് നമ്മളാണ് കെണിയില് വീഴുക. ദയവ് ചെയ്ത് ഇത് ഓര്ത്തുവയ്ക്കണം’ മക്കള് സെല്വന് വിജയ് സേതുപതി പറഞ്ഞു.
തമിഴ്നാട്ടില് ഉള്ളത് പോലെ തന്നെ കേരളത്തിലും ആരാധകരുള്ള ഒരു താരമാണ് വിജയ് സേതുപതി. താരത്തിന്റെ ’96’ എന്ന ചിത്രം കേരളത്തിലും സൂപ്പര് ഹിറ്റായിരുന്നു. മലയാളത്തിലും താരം അഭിനയിക്കുന്നുണ്ട്. ജയറാമിനൊപ്പമാണ് താരം മലയാളത്തില് എത്തുന്നത്.
Discussion about this post