മാനന്തവാടി: പ്രധാനമന്ത്രി നരേന്ദ്ര മോഡിക്ക് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്കെതിരെ പ്രചാരണം നടത്താന്‍ പോലും ഭയമാണെന്ന് കോണ്‍ഗ്രസ് വക്താവും ചലച്ചിത്ര താരവുമായ ഖുശ്ബുവിന്റെ പരിഹാസം. മാനന്തവാടിയിലെ കുഞ്ഞോത്ത് നടന്ന തെരഞ്ഞെടുപ്പ് യോഗത്തെ അഭിസംബോധന ചെയ്ത് സംസാരിക്കവെയാണ് ഖുശ്ബു ആരോപണം ഉന്നയിച്ചത്.
രാഹുല്‍ ഗാന്ധി മത്സരിക്കുന്ന വയനാട്ടിലും അമേഠിയിലും പ്രചാരണത്തിനെത്താന്‍ പ്രധാനമന്ത്രി നരേന്ദ്രമോഡിക്ക് ഭയമാണെന്നും ഖുശ്ബു പറഞ്ഞു. ശബരിമല സ്ത്രീപ്രവേശനം സംബന്ധിച്ച രാഹുല്‍ ഗാന്ധിയുടെ നിലപാടിനെ അംഗീകരിക്കുന്നുവെന്നും ഖുശ്ബു വ്യക്തമാക്കി.
എന്നാല്‍ ലിംഗസമത്വത്തെ സ്വാഗതം ചെയ്യുന്ന സുപ്രീംകോടതി വിധി അംഗീകരിക്കുന്നുവെങ്കിലും നൂറ്റാണ്ടുകള്‍ പഴക്കമുള്ള ആചാരങ്ങള്‍ മാറ്റാന്‍ ഒറ്റയടിയ്ക്ക് കഴിയില്ലെന്നും ഖുശ്ബു പറഞ്ഞു. പൊതുയോഗത്തിന് ശേഷം ഇരുപത് മിനിറ്റോളം റോഡ് ഷോ നടത്തിയ ശേഷമാണ് ഖുശ്ബു മടങ്ങിയത്.