ന്യൂഡല്‍ഹി: സ്ഥാനാര്‍ത്ഥികളുടെ ഏഴാമത്തെ പട്ടിക പ്രസിദ്ധീകരിച്ച് കോണ്‍ഗ്രസ്. ഉത്തര്‍പ്രദേശ്, തമിഴ്‌നാട്, മഹാരാഷ്ട്ര, ഛത്തീസ്ഗഢ് തുടങ്ങിയ സംസ്ഥാനങ്ങളിലെ 35 സീറ്റുകളിലെ സ്ഥാനാര്‍ത്ഥികളെയാണ് പട്ടികയില്‍ ഉള്‍പ്പെടുത്തിയിരിക്കുന്നത്. ഉത്തര്‍പ്രദേശിലെ മൊറാദാബാദില്‍ നിന്നും പിസിസി അധ്യക്ഷന്‍ രാജ് ബബ്ബറെ മത്സരിപ്പിക്കാനുള്ള തീരുമാനം മാറ്റി. പകരം ഫത്തേപ്പൂര്‍ സിക്രിയില്‍ നിന്നാകും രാജ് ബബ്ബര്‍ മത്സരിക്കുക. കന്യാകുമാരിയില്‍ നിന്ന് എച്ച് വസന്ത്കുമാര്‍ ജനവിധി തേടും. കാര്‍ത്തി ചിദംബരം സജീവപരിഗണനയിലുള്ള ശിവഗംഗ മണ്ഡലത്തിലെ സ്ഥാനാര്‍ത്ഥിയെ ഇത്തവണയും പ്രഖ്യാപിച്ചിട്ടില്ല.
മുന്‍ കേന്ദ്രമന്ത്രി രേണുക ചൗധരി തെലങ്കാനയിലെ ഖമ്മത്ത് നിന്നാകും മത്സരിക്കുക. ജമ്മു കശ്മീരിലെ ഉധംപൂര്‍ മണ്ഡലത്തില്‍ മുന്‍ കേന്ദ്രമന്ത്രി കരണ്‍ സിംഗിന്റെ മകന്‍ വിക്രമാദിത്യ സിംഗ് മത്സരിക്കും. ലോക്‌സഭാ തെരഞ്ഞെടുപ്പിനുള്ള ഏഴാം ഘട്ട സ്ഥാനാര്‍ത്ഥി പട്ടികയ്‌ക്കൊപ്പം ഒഡിഷ നിയമസഭാ തെരഞ്ഞെടുപ്പിനുള്ള 54 സ്ഥാനാര്‍ത്ഥികളുടെ പട്ടികയും കോണ്‍ഗ്രസ് പുറത്തിറക്കി.