ന്യൂഡല്‍ഹി: ട്രെയിന്‍ ടിക്കറ്റ് ഇനി മുതല്‍ ഗൂഗിള്‍ പേ ഉപയോഗിച്ച് ബുക്ക് ചെയ്യാന്‍ സാധിക്കും. ഗൂഗിള്‍ പേയുടെ ആന്‍ഡ്രോയിഡ്, ഐഒഎസ് പതിപ്പുകളില്‍ ട്രെയിന്‍ ടിക്കറ്റ് ബുക്ക് ചെയ്യാനുള്ള സൗകര്യം ഏര്‍പ്പെടുത്തി. ഇനി മുതല്‍ ട്രെയിന്‍ ടിക്കറ്റുകള്‍ ബുക്ക് ചെയ്യാനും ടിക്കറ്റ് കാന്‍സല്‍ ചെയ്യാനുമുള്ള സൗകര്യം ഗൂഗിള്‍ പേ ആപ്പില്‍ ലഭ്യമാണ്. ടിക്കറ്റ് ബുക്ക് ചെയ്യുന്നതിന് അധിക ചാര്‍ജുകള്‍ ഒന്നും ഈടാക്കുകയില്ല.
അഭിബസ്, റെഡ്ബസ്, യൂബര്‍, യാത്ര പോലുള്ള സര്‍വീസുകള്‍ക്ക് ഗൂഗിള്‍ പേ സൗകര്യങ്ങള്‍ ഏര്‍പ്പെടുത്തിയതിലൂടെ മികച്ച അഭിപ്രായമാണ് ഉപയോക്താക്കളില്‍ നിന്നും ലഭിച്ചതെന്ന് ഗൂഗിള്‍ പേ പ്രൊഡക്റ്റ് മാനേജ്മെന്റ് ഡയറക്ടര്‍ അംബരീഷ് കെംഗെ പറഞ്ഞു. ഇതുപോലെ ട്രെയിന്‍ യാത്രക്കാരുടെ യാത്ര എളുപ്പമാക്കുകയാണ് പുതിയ സംവിധാനത്തിലൂടെ ഗൂഗിള്‍ പേ.
സീറ്റ് ലഭ്യത, യാത്രാ സമയം, രണ്ട് സ്റ്റേഷനുകള്‍ തമ്മിലുള്ള യാത്രാ സമയം, എന്നിവയും ഗൂഗിള്‍ പേ ആപ്പ് വഴി അറിയാം. ഈ ഫീച്ചര്‍ ലഭിക്കുവാന്‍ ഗൂഗിള്‍ പേ ആപ്പ് അപ്ഡേറ്റ് ചെയ്താല്‍ മതി. ഐആര്‍സിടിസി ഐഡി ഉപയോഗിച്ച് ലോഗിന്‍ ചെയ്താണ് ടിക്കറ്റുകള്‍ ബുക്ക് ചെയ്യേണ്ടത്.
Discussion about this post