ബരാബങ്കി: മോഡിയെ മഹിഷാസുരനാക്കി കോണ്‍ഗ്രസുകാര്‍ പോസ്റ്റര്‍ ഇറക്കിയതിന് പിന്നാലെ അതേ നാണയത്തില്‍ തിരിച്ചടിച്ച് ബിജെപി രംഗത്തെത്തി. പ്രിയങ്ക ഗാന്ധിയെ മഹിഷാസുരയാക്കിയാണ് ബിജെപി പോസ്റ്റര്‍ ഇറക്കിയിരിക്കുന്നത്. യുപിയിലെ ബാരാബങ്കിയിലാണ് പ്രിയങ്കാ ഗാന്ധിയെ മഹിഷാസുരയാക്കി ബിജെപിയുടെ പോസ്റ്റര്‍. ഇതേ പോസ്റ്ററില്‍ ബിജെപി നേതാവ് പ്രിയങ്കാ സിങ് റാവത്തിനെ ദുര്‍ഗാ ദേവിയായിട്ടാണ് ബിജെപി ചിത്രീകരിച്ചിരിക്കുന്നത്.
ഇതിനെതിരെ പരാതിയുമായി രംഗത്തെത്തിയിരിക്കുകയാണ് മഹിളാ കോണ്‍ഗ്രസ്. പ്രിയങ്കക്കെതിരെ വ്യാപകമായി നടക്കുന്ന ഓണ്‍ലൈന്‍ ആക്രമണങ്ങള്‍ക്കെതിരെയാണ് പരാതി ഉയര്‍ന്നത്. സോഷ്യല്‍ മീഡിയ വഴി പ്രിയങ്കയെ അധിക്ഷേപിക്കുകയാണെന്നും ഇതിനെതിരെ കര്‍ശന നടപടി വേണമെന്നുമാണ് മഹിളാ കോണ്‍ഗ്രസ് ആവശ്യപ്പെടുന്നത്.
അതേ സമയം ഈ പോസ്റ്ററിനെ കുറിച്ച് ചോദിച്ചപ്പോള്‍ താന്‍ അങ്ങനെയൊരു പോസ്റ്റര്‍ കണ്ടിട്ടില്ലെന്നായിരുന്നു പ്രിയങ്കാ സിങ് റാവത്ത് പ്രതികരിച്ചത്. ആരാണ് അങ്ങനെ ചെയ്തെന്ന് പരിശോധിക്കുമെന്നും റാവത്ത് പറഞ്ഞു. കഴിഞ്ഞ ദിവസം ബിജെപി എംഎല്‍എ സുരേന്ദ്ര ജെയ്ന്‍ രാഹുലിനെ രാവണന്‍ എന്നും പ്രിയങ്കയെ ശൂര്‍പ്പണഖയെന്നും വിളിച്ച് അധിക്ഷേപിച്ചിരുന്നു.