മുംബൈ: താരങ്ങൾ തിങ്ങിനിറഞ്ഞ അംബാനി കല്യാണത്തിൽ അസാന്നിധ്യം കൊണ്ട് ചർച്ചയായി ഇന്ത്യൻ ക്രിക്കറ്റ് ടീം നായകൻ രോഹിത് ശർമ്മ. മുംബൈയിൽ അനന്ത് അംബാനി-രാദിക മെർച്ചന്റ് വിവാഹം പൊടിപൊടിക്കുമ്പോൾ വിംബിൾഡൺ ടെന്നീസ് കാണാനായി പോയിരിക്കുകയാണ് രോഹിത്. മുംബൈ ഇന്ത്യൻസ് ഉടമകൾ കൂടിയായ അംബാനി കുടുംബത്തിലെ സുപ്രധാന ചടങ്ങിൽ രോഹിത് പങ്കെടുക്കാത്തത് വലിയ ചർച്ചയാവുകയാണ്.
സിനിമാ-കായിക-രാഷ്ട്രീയ മേഖലകളിലെ പ്രമുഖർ അംബാനി കുടുംബത്തിലെ കല്യാണത്തിനെത്തിയിട്ടുണ്ട്. ഈ സമയം രോഹിത് കാർലോസ് അൽകരാസും ഡാനിൽ മെദ്വദേവും തമ്മിലുള്ള പുരുഷ സിംഗിൾസ് സെമി ഫൈനൽ പോരാട്ടം കാണാനെത്തിയിരിക്കുകയാണ്.
രോഹിതിന്റെ ടെന്നീസ് കോർട്ടിൽ നിന്നുള്ള ചിത്രങ്ങൾ സോഷ്യൽ മീഡിയയിൽ വൈറലായിരുന്നു. മുൻ ഇന്ത്യൻ താരം ദിനേശ് കാർത്തിക്കും രോഹിത്തിനൊപ്പമുണ്ട്. അതേസമയം, മുംബൈ ഇന്ത്യൻസ് ടീമിനകത്തെ പടലപ്പിണക്കങ്ങളാണോ രോഹിതിനെ അകറ്റി നിർത്തുന്നതെന്നാണ് സോഷ്യൽമീഡിയയിലെ ചോദ്യം.
മുംബൈ ഇന്ത്യൻസിന്റെ നിലവിലെ ക്യാപ്റ്റനായ ഹാർദ്ദിക് പാണ്ഡ്യയടക്കം വിവാഹത്തിൽ സജീവസാന്നിധ്യമറിയിക്കുന്നുമുണ്ട്. വിരാട് കോഹ്ലിയും കല്യാണത്തിനെത്തിയിട്ടില്ല. താരം കുടുംബത്തോടൊപ്പം ലണ്ടനിലാണ്.