ഡെറാഡൂണ്‍: ഉത്തരാഖണ്ഡില്‍ ടെംപോ ട്രാവലര്‍ കൊക്കയിലേക്ക് മറിഞ്ഞ് 12 പേര്‍ക്ക് ദാരുണാന്ത്യം. 14 പേര്‍ക്ക് പരിക്കേറ്റു. ഇവരില്‍ നാല് യാത്രക്കാരുടെ നില ഗുരുതരമാണെന്നാണ് റിപ്പോര്‍ട്ട്. രുദ്രപ്രയാഗ് ജില്ലയിലെ റൈതോലി മേഖലയിലാണ് അപകടം നടന്നത്.
പരിക്കേറ്റ 10 പേരെ ജില്ലാ ആശുപത്രിയിലും, ഗുരുതരമായി പരിക്കേറ്റ് 4 പേരെ എയിംസ് ഋഷികേശിലേക്കും മാറ്റി. ബദരീനാഥ് റൂട്ടില്‍ രുദ്രപ്രയാഗില്‍ നിന്ന് 5 കിലോമീറ്റര്‍ അകലെ റൈറ്റോലിയിലായിരുന്നു അപകടം. മരിച്ച 12 പേരില്‍ ആറ് പേരും സ്ത്രീകളാണെന്നാണ് സൂചന.
ഹരിയാന രജിസ്‌ട്രേഷന്‍ നമ്പറിലുള്ള വാഹനം വെള്ളിയാഴ്ച രാത്രി 11 മണിയോടെ ദില്ലിയില്‍ നിന്ന് പുറപ്പെട്ട് ചോപ്തയിലേക്കും ഉഖിമഠിലേക്കും പോകുകയായിരുന്നു. യാത്രക്കാര്‍ തീര്‍ഥാടകരാണോ അതോ വിനോദസഞ്ചാരികളാണോ എന്ന് ഇതുവരെ വ്യക്തമായിട്ടില്ല. അപകടത്തിന്റെ കാരണവും ഇതുവരെ വ്യക്തമായിട്ടില്ല. വാഹനത്തില്‍ 26 പേരുണ്ടായിരുന്നതായാണ് സൂചന.