ഔറംഗാബാദ്: രാവണ രൂപം ദസറ ആഘോഷത്തോട് അനുബന്ധിച്ച് കത്തിക്കുന്നതില്‍ പ്രതിഷേധിച്ച് ഒരു കൂട്ടം ഭര്‍ത്താക്കന്‍മാര്‍. പുരുഷന്‍മാര്‍ക്കെതിരെയുള്ള സ്വേച്ഛാധിപത്യത്തെ എതിര്‍ക്കുന്നുവെന്ന് കാട്ടി രാവണന്റെ സഹോദരി ശൂര്‍പ്പണഖയുടെ രൂപം കത്തിച്ചാണ് പ്രതിഷേധം. മഹാരാഷ്ട്രയിലെ ഔറംഗാബാദിലെ പത്‌നി പീഡിത് പുരുഷ് സംഘാടനയിലെ അംഗങ്ങളാണ് പ്രതിഷേധവുമായി രംഗത്തെത്തിയത്.
ഭാര്യമാരുടെ പീഡനം മൂലം യാതനകള്‍ അനുഭവിക്കുന്നവരാണ് സംഘടനയിലെ അംഗങ്ങള്‍. ഇന്ത്യയിലെ മുഴുവന്‍ നിയമങ്ങളും സ്ത്രീക്ക് അനുകൂലമാണ്. ഇത് ചെറിയ പ്രശ്‌നങ്ങളില്‍പോലും ഭര്‍ത്താക്കന്‍മാരെ ഭീഷണിപ്പെടുത്തുന്നതിന് അവര്‍ ദുരുപയോഗം ചെയ്യുന്നുവെന്നും സംഘടനയുടെ സ്ഥാപകനായ ഭാരത് ഫൂലേറെ പറഞ്ഞു.
പുരുഷനെതിരെ നടക്കുന്ന ഇത്തരം സ്വേച്ഛാധിപത്യത്തെ എതിര്‍ക്കുന്നു. അതുകൊണ്ടാണ് ഒരു പ്രതീകാത്മക നടപടി എന്ന നിലയില്‍ ദസറ ദിവസം ശൂര്‍പ്പണഖയുടെ രൂപം കത്തിച്ചതെന്നും ഫൂലേറെ കൂട്ടിച്ചേര്‍ത്തു. ഔറംഗാബാദിലെ കരോലി ഗ്രാമത്തില്‍ വെച്ചാണ് പ്രവര്‍ത്തകര്‍ ശൂര്‍പ്പണഖയുടെ രൂപം കത്തിച്ചത്.
Discussion about this post