ചെന്നൈ: തമിഴ്‌നാട്ടിലെ സിവില്‍ സര്‍വീസ് ഉദ്യോഗാര്‍ഥികള്‍ക്കായി 7500 രൂപ ധനസാഹയം പ്രഖ്യാപിച്ച് ഡിഎംകെ സര്‍ക്കാര്‍. 10 മാസത്തേക്കാണ് ഉദ്യോഗാര്‍ഥികള്‍ക്ക് സ്‌റ്റൈപന്‍ഡ് ആയി പണം നല്‍കുകയെന്ന് സംസ്ഥാന യുവജന ക്ഷേമ, കായിക വികസന മന്ത്രി ഉദയനിധി സ്റ്റാലിന്‍ പ്രഖ്യാപിച്ചു. 1000 പേര്‍ക്കാണ് ധനസഹായം നല്‍കുക.
കൂടാതെ, സിവില്‍ സര്‍വീസ് ഉദ്യോഗാര്‍ഥികള്‍ക്കായി പരിശീലന കേന്ദ്രങ്ങള്‍ സ്ഥാപിക്കുമെന്നും ഉദയനിധി വ്യക്തമാക്കി. യുപിഎസ്‌സി, ഇന്ത്യന്‍ ബാങ്ക് സര്‍വീസ്, റെയില്‍വേ എന്നീ ജോലികള്‍ യുവാക്കള്‍ നേടുക എന്നതാണ് ദ്രാവിഡ മോഡല്‍ ലക്ഷ്യമിടുന്നത്.
ബിരുദധാരികളായ വിദ്യാര്‍ഥികള്‍ വേണമെന്നാണ് കരുണാനിധി ആഹ്വാനം ചെയ്തതെന്നും യുവജനങ്ങളുടെ ഉയര്‍ച്ചക്ക് വേണ്ടിയാണ് പെരിയാറും കരുണാനിധിയും പ്രവര്‍ത്തിച്ചതെന്നും ഉദയനിധി സ്റ്റാലിന്‍ പറഞ്ഞു.
സര്‍ക്കാറിന്റെ നാന്‍ മുതല്‍വന്‍ പദ്ധതി 13 ലക്ഷം വിദ്യാര്‍ഥികള്‍ക്ക് ഗുണം ചെയ്യുന്നതും 1.5 ലക്ഷം പേര്‍ക്ക് ജോലി നല്‍കുന്നതുമാണെന്ന് അദ്ദേഹം പറഞ്ഞു. യുവാക്കള്‍ കേന്ദ്ര സര്‍ക്കാര്‍ ജോലികള്‍ നേടണം. യുവാക്കളുടെ സ്വപ്നം സാക്ഷാത്കരിക്കാനാണ് നാന്‍ മുതല്‍വന്‍ പദ്ധതിയെന്നും ഉദയനിധി സ്റ്റാലിന്‍ വിശദമാക്കി.