ന്യൂഡല്‍ഹി: ബീഹാറിലെ ബക്‌സറില്‍ ട്രെയിന്‍ പാളം തെറ്റി 4 യാത്രക്കാര്‍ മരിച്ചു. അപകടത്തില്‍ 100ലേറെ പേര്‍ക്ക് പരിക്കേറ്റു. ഡല്‍ഹിയില്‍ നിന്ന് അസമിലെ ഗുവാഹത്തിയിലേക്കു പോകുകയായിരുന്ന 12506 നോര്‍ത്ത് ഈസ്റ്റ് എക്‌സ്പ്രസിന്റെ 6 കോച്ചുകള്‍ രഘുനാഥ്പുര്‍ സ്റ്റേഷന് സമീപമാണ് പാളം തെറ്റിയത്. ഇന്നലെ രാത്രിയോടെയാണ് അപകടം നടന്നത്. സ്ഥലത്ത് രക്ഷാപ്രവര്‍ത്തനം പുരോഗമിക്കുകയാണ്.
നാട്ടുകാരാണ് ആദ്യം രക്ഷാപ്രവര്‍ത്തനത്തിന് എത്തിയത്. തുടര്‍ന്ന് ദുരന്തനിവാരണ സേന സ്ഥലത്തെത്തി. 3 എസി കോച്ചുകള്‍ അടക്കം 6 കംപാര്‍ട്‌മെന്റുകളാണു പാളം തെറ്റിയത്. പട്‌നയിലേത് അടക്കം ആശുപത്രികളെല്ലാം സജ്ജമാക്കി. അപകടം മൂലം ഈ പാതയില്‍ ഗതാഗതം സ്തംഭിച്ചു. ഒട്ടേറെ ട്രെയിനുകള്‍ വഴിതിരിച്ചുവിട്ടു.