ചെസ് ലോകകപ്പില്‍ രണ്ടാംസ്ഥാനം നേടി ഇന്ത്യക്ക് അഭിമാനമായി മാറിയ ആര്‍. പ്രഗ്‌നാനന്ദയുടെ കുടുംബത്തിന് എക്‌സ്‌യുവി സമ്മാനമായി നല്‍കുമെന്ന് അറിയിച്ച് ആനന്ദ് മഹീന്ദ്ര. ട്വിറ്ററിലൂടെയാണ് ആനന്ദ് മഹീന്ദ്ര ഇക്കാര്യം അറിയിച്ചത്.
ചെസ് ലോകകപ്പ് ഫൈനലില്‍ നോര്‍വേയുടെ മാഗ്‌നസ് കാള്‍സനോടു പൊരുതിത്തോറ്റ പ്രഗ്‌നാനന്ദയ്ക്കു എക്‌സ്‌യുവി400 ഇവി സമ്മാനിക്കണമെന്ന് ആരാധകനാണ് ട്വിറ്ററിലൂടെ ആനന്ദ് മഹീന്ദ്രയോട് ആവശ്യപ്പെട്ടത്. ഇതിന് നല്കിയ മറുപടിയിലാണ് ആനന്ദ് മഹീന്ദ്ര വാഹനം സമ്മാനിക്കുമെന്ന് അറിയിച്ചത്.
also read; ഭാര്യയെ തല്ലാന്‍ ഒരു നിയമവും ഭര്‍ത്താവിന് അവകാശം നല്‍കുന്നില്ല; ഡല്‍ഹി ഹൈക്കോടതി
ചെസില്‍ വളരുന്നതിനു പ്രഗ്‌നാനന്ദയ്ക്കു നല്കിയ പിന്തുണയ്ക്കുള്ള നന്ദിയായാണു മാതാപിതാക്കള്‍ക്ക് വാഹനം സമ്മാനിക്കുന്നതെന്നും നമ്മുടെ നന്ദി അവര്‍ അര്‍ഹിക്കുന്നുണ്ടെന്നും ആനന്ദ് മഹീന്ദ്ര പ്രതികരിച്ചു.
‘എനിക്കു മറ്റൊരു ആശയമാണുള്ളത്. കുഞ്ഞുങ്ങളെ ചെസ്സിലേക്ക് അടുപ്പിക്കുന്നതിന് രക്ഷിതാക്കളെ പ്രോത്സാഹിപ്പിക്കാന്‍ ഞാന്‍ ആഗ്രഹിക്കുന്നു. വൈദ്യുത വാഹനങ്ങള്‍ പോലെ തന്നെ, നല്ല ഭാവിക്കായുള്ള നിക്ഷേപമാണത്. പ്രഗ്‌നാനന്ദയുടെ രക്ഷിതാക്കളായ നാഗലക്ഷ്മിക്കും രമേഷ് ബാബുവിനും എക്‌സ്‌യുവി400 ഇവി സമ്മാനിക്കാന്‍ ഞാന്‍ ആലോചിക്കുന്നുണ്ട്. മകന്റെ താല്‍പര്യത്തെ വളര്‍ത്തിയതിനും, പിന്തുണച്ചതിനും നമ്മുടെ നന്ദി അവര്‍ അര്‍ഹിക്കുന്നുണ്ട്’- ആനന്ദ് മഹീന്ദ്ര