ബംഗളൂരു: കന്നഡ നടൻ സൂരജിന് (ധ്രുവൻ) വാഹനാപകടത്തിൽ ഗുരുതരമായി പരിക്കേറ്റു. ബൈക്കപകടത്തിലാണ് പരിക്കേറ്റത്. ശനിയാഴ്ച ബേഗൂരിനടുത്ത് മൈസൂരു-ഗുണ്ട്ലൂപ്പർ ഹൈവേയിൽ വെച്ചാണ് അപകടമുണ്ടായത്. പരിക്കുപറ്റിയ ഉടൻ മൈസൂരുവിലെ മണിപ്പാൽ ആശുപത്രിയിൽ പ്രവേശിപ്പിക്കുകയായിരുന്നു. താരത്തിന് ശസ്ത്രക്രിയ നടത്തുകയും വലതുകാൽ മുറിച്ചുമാറ്റുകയും ചെയ്‌തെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.
ശനിയാഴ്ച വൈകിട്ട് നാലു മണിയോടെയാണ് അപകടം സംഭവിച്ചത്. മൈസൂരിൽ നിന്ന് ഊട്ടിയിലേക്ക് ബൈക്കിൽ പോവുകയായിരുന്നു സൂരജ്. ട്രാക്ടറിനെ മറികടക്കാൻ ശ്രമിക്കുന്നതിനിടെ ബൈക്ക് നിയന്ത്രണം വിട്ട് ടിപ്പർ ലോറിയിൽ ഇടിച്ചു കയറുകയായിരുന്നു. ഗുരുതരമായി പരിക്കേറ്റ സൂരജിന്റെ കാൽമുട്ടിന് താഴെവച്ച് മുറിച്ചുമാറ്റിയെന്നാണ് റിപ്പോർട്ട്.
അനൂപ് അന്തോണി സംവിധാനം ചെയ്യുന്ന ഭഗവാൻ ശ്രീകൃഷ്ണ പരമാത്മ എന്ന ചിത്രത്തിലൂടെയാണ് സൂരജ് കുമാർ അരങ്ങേറ്റം കുറിക്കേണ്ടിയിരുന്നത്. കന്നഡ താരം ദർശൻ ചിത്രം ലോഞ്ച് ചെയ്‌തെങ്കിലും പിന്നീട് ചില കാരണങ്ങളാൽ ചിത്രം മാറ്റിവയ്ക്കുകയായിരുന്നു.
‘രഥം’ എന്ന പേരിൽ മറ്റൊരു സിനിമയുടെ തിരക്കിലായിരുന്നു താരം. പ്രിയ പ്രകാശ് വാര്യർ നായികയാവുന്ന ഇതുവരെ പേരിട്ടിട്ടില്ലാത്ത ഒരു പ്രോജക്റ്റിലും സൂരജ് ഒപ്പുവച്ചിരുന്നു.
ALSO READ- കനിമൊഴി എംപി കയറി ബസിലെ ജോലി പോയി, ഷര്‍മിളയ്ക്ക് കാര്‍ സമ്മാനിച്ച് കമല്‍ഹാസന്‍
കന്നഡ സിനിമാ ലോകത്തെ സൂപ്പർ താരമായ ശിവരാജ് കുമാറിന്റെ മാതാവ് പർവതമ്മയുടെ അനന്തരവനാണ് സൂരജ്. കന്നഡ നിർമാതാവ് എസ്എ ശ്രീനിവാസ് ആണ് സൂരജിന്റെ പിതാവ്.
Discussion about this post