ചെന്നൈ: തമിഴ്നാട്ടിൽ ഡിഎംകെ നതാവിന്റെ മകളായ 23കാരിയെ കൊലപ്പെടുത്തി മൃതദേഹം വനത്തിൽ ഉപേക്ഷിച്ച സംഭവത്തിൽ 17-കാരൻ അറസ്റ്റിൽ. ധർമപുരിയിലെ ഡിഎംകെ കൗൺസിലർ ഭുവനേശ്വരന്റെ മകൾ ഹർഷയാണ് മരണപ്പെട്ടത്. ഈ കേസിലാണ് യുവതിയുടെ കാമുകൻ കൂടിയായ 17-കാരൻ അറസ്റ്റ് ചെയയപ്പെട്ടത്.
പോലീസ് ചോദ്യംചെയ്യലിൽ പ്രതി കുറ്റംസമ്മതിച്ചു. മറ്റൊരാളുമായി യുവതിക്ക് അടുപ്പമുണ്ടെന്ന സംശയമാണ് കൊലപാതകത്തിന് പിന്നിലെന്ന് പോലീസ് അറിയിച്ചു. ഇയാളെ ഒഴിവാക്കാൻ ഹർഷ ശ്രമിക്കുന്നെന്നായിരുന്നു ഇയാളുടെ സംശയം. ഹൊസൂരിലെ സ്വകാര്യ കമ്പനിയിൽ ജീവനക്കാരിയായ ഹർഷയെ ബുധനാഴ്ച രാവിലെയാണ് കൊമ്പൈ വനമേഖലയിൽ യുവതിയുടെ മൃതദേഹം കണ്ടെത്തിയത്.
ദുരൂഹസാഹചര്യത്തിൽ യുവതിയുടെ മൃതദേഹം കണ്ടതോടെ നാട്ടുകാർ പോലീസിൽ വിവരമറിയിക്കുകയായിരുന്നു. പോലീസ് നടത്തിയ പരിശോധനയിൽ യുവതിയുടെ മൊബൈൽഫോണും കണ്ടെടുത്തു. തുടർന്ന് നടത്തിയ അന്വേഷണമാണ് കേസിൽ വഴിത്തിരിവായത്.
യുവതിയുടെ ഫോൺവിളി വിവരങ്ങൾ പരിശോധിച്ചപ്പോൾ ചൊവ്വാഴ്ച വൈകിട്ട് 17-കാരനെയാണ് വിളിച്ചതെന്ന് വ്യക്തമായി. തുടർന്ന് 17-കാരനെ കണ്ടെത്തി ചോദ്യംചെയ്തതോടെയാണ് കൊലപാതകത്തിന്റെ ചുരുളഴിഞ്ഞത്.