പൂനെ: പൂനെയില്‍ ബിജെപി പ്രവര്‍ത്തകന്‍ മയൂര്‍ മുണ്ടെ നിര്‍മ്മിച്ച മോഡി ക്ഷേത്രത്തിലെ പ്രധാനമന്ത്രി നരേന്ദ്ര മോഡിയുടെ പ്രതിമ നീക്കം ചെയ്തു. വ്യാപക വിമര്‍ശനം ഉയര്‍ന്നതിന്റെ അടിസ്ഥാനത്തിലാണ് പ്രതിമ നീക്കം ചെയ്തത്.
ക്ഷേത്രവും ടാര്‍പോളിന്‍ കൊണ്ട് മറച്ചിട്ടുണ്ട്. അതേസമയം, പ്രതിമ നീക്കം ചെയ്യാനുള്ള കാരണമെന്താണെന്ന് പുറത്തുവിട്ടിട്ടില്ല. എന്നാല്‍ പ്രധാനമന്ത്രിയുടെ ഓഫീസ് ആവശ്യപ്പെട്ടതനുസരിച്ചാണ് ക്ഷേത്രത്തില്‍നിന്ന് പ്രതിമ നീക്കം ചെയ്തതെന്നാണ് ലഭിക്കുന്ന വിവരം.
പ്രതിപക്ഷ പാര്‍ട്ടികള്‍ ക്ഷേത്രത്തിനെതിരേ രംഗത്തുവന്നിരുന്നു. ക്ഷേത്രനിര്‍മാണം വിവാദമായതോടെ ക്ഷേത്രം നിര്‍മിച്ച മയൂര്‍ മുണ്ടെയെ ബിജെപി തള്ളിപ്പറഞ്ഞിരുന്നു. ക്ഷേത്രം നിര്‍മിച്ചത് പാര്‍ട്ടിയുടെ അറിവോടെയല്ലെന്നാണ് ബി.ജെ.പി. പ്രാദേശിക നേതൃത്വം പറയുന്നത്. ക്ഷേത്രം നിര്‍മിച്ച പ്രവര്‍ത്തകനെതിരേ നടപടിയെടുക്കണമെന്നും ആവശ്യവും ശക്തമാവുന്നുണ്ട്.