ബെംഗളുരു : കല്‍പ്പള്ളി ശ്മശാനത്തില്‍ പിറന്നാളാഘോഷം നടത്തുകയും മദ്യപിച്ച് ബഹളമുണ്ടാക്കുകയും ചെയ്ത നാലംഗസംഘത്തെ പോലീസ് അറസ്റ്റ് ചെയ്തു.
തിങ്കളാഴ്ച പുലര്‍ച്ചെ പട്രോളിംഗിനിറങ്ങിയ പോലീസുകാരാണ് ശ്മശാനത്തിനുള്ളില്‍ നിന്ന് ഇവരെ പിടികൂടിയത്. പതിവില്ലാതെ ബഹളം കേട്ട പോലീസുകാരുടെ പരിശോധനയില്‍ നാല്‍വര്‍ സംഘം അറസ്റ്റിലാവുകയായിരുന്നു. പിടിയിലായവരില്‍ ഒരാളുടെ പിറന്നാളാഘോഷിക്കാനാണ് ഇവര്‍ ശ്മശാനം തിരഞ്ഞെടുത്തത്.
ആളൊഴിഞ്ഞ സ്ഥലമായതിനാല്‍ ശ്മശാനത്തിലെത്തുകയായിരുന്നുവെന്നാണ് മൊഴി. കല്‍പ്പള്ളി സ്വദേശികളായ രാജ് കിരണ്‍ (27), ജൂഡ് ഫിലിപ്പ് (27), ഡൊമിനിക് (25), ധരണേശ്വരന്‍ (28) എന്നിവരാണ് പിടിയിലായത്.പോലീസിനെ കണ്ടതോടെ രക്ഷപെടാന്‍ ശ്രമിച്ച ഇവരെ ഓടിച്ചിട്ട് പിടികൂടുകയായിരുന്നു. പിടിയിലായതോടെ ഇവര്‍ പോലീസിനെ ഭീഷണിപ്പെടുത്തുകയും ചെയ്തു. സമൂഹമാധ്യമങ്ങളിലൂടെ പോലീസിനെ അപമാനിക്കുമെന്നായിരുന്നു ഭീഷണി.
ശ്മശാനത്തില്‍ അതിക്രമിച്ചു കയറി, കോവിഡ് മാനദണ്ഡം ലംഘിച്ച് പിറന്നാളാഘോഷം സംഘടിപ്പിച്ചു, പോലീസുകാരുടെ ജോലി തടസ്സപ്പെടുത്താന്‍ ശ്രമിച്ചു തുടങ്ങിയ കുറ്റങ്ങള്‍ ചുമത്തിയാണ് ഇവര്‍ക്കെതിരെ കേസെടുത്തിരിക്കുന്നത്.
Discussion about this post