ന്യൂഡൽഹി: കോവിഡ് പ്രതിരോധ വാക്‌സിൻ സ്വീകരിച്ച യാത്രക്കാർക്ക് ടിക്കറ്റ് നിരക്കിൽ വൻ ഡിസ്‌കൗണ്ട് ഓഫറുകളുമായി ഇൻഡിഗോ എയർലൈൻസ്. കോവിഡ് വാക്‌സിന്റെ ഒരു ഡോസ് അല്ലെങ്കിൽ രണ്ടു ഡോസും സ്വീകരിച്ച യാത്രക്കാർക്ക്, ടിക്കറ്റ് നിരക്കിന്റെ പത്തുശതമാനം വരെയാണ് ഡിസ്‌കൗണ്ട് ലഭ്യമാവുക.
ഡിസ്‌കൗണ്ട് ലഭിച്ച യാത്രക്കാർ, കേന്ദ്ര ആരോഗ്യ മന്ത്രാലയം നൽകുന്ന കോവിഡ് വാക്‌സിനേഷൻ സർട്ടിഫിക്കറ്റ് ഹാജരാക്കണം. അല്ലെങ്കിൽ തങ്ങളുടെ വാക്‌സിനേഷൻ സ്റ്റാറ്റസ് ആരോഗ്യസേതു മൊബൈൽ ആപ്പിൽ വിമാനത്താവളത്തിലെ ചെക്ക് ഇൻ കൗണ്ടർ/ ബോർഡിങ് ഗേറ്റിൽ കാണിച്ചാൽ മതിയാകും.
ഇന്നു മുതലാണ് ഡിസ്‌കൗണ്ട് ഓഫർ നിലവിൽ വരികയെന്ന് കമ്പനി പത്രക്കുറിപ്പിൽ അറിയിച്ചു. പതിനെട്ടു വയസ്സിനു മുകളിൽ പ്രായമുള്ള യാത്രക്കാർക്കാണ് ഡിസ്‌കൗണ്ട് ആനുകൂല്യം ലഭിക്കുക. ടിക്കറ്റ് ബുക്ക് ചെയ്യുന്ന സമയത്ത് ഇന്ത്യയിലുണ്ടായിരിക്കണം, കോവിഡ് വാക്‌സിൻ സ്വീകരിച്ചിട്ടുണ്ടായിരിക്കണം തുടങ്ങിയവയാണ് മറ്റ് നിബന്ധനകൾ.