ചെന്നൈ: രാജ്യം കോവിഡ് വ്യാപനത്തിൽ പ്രതിസന്ധിയിലായിരിക്കെ സഹായഹസ്തവുമായി നടൻ അജിത് രംഗത്ത്. കോവിഡ് സ്ഥിതിഗതികൾ രൂക്ഷമായ തമിഴ്‌നാട്ടിലെ കോവിഡ് പ്രതിരോധ പ്രവർത്തനങ്ങൾക്കായി സിനിമാതാരം അജിത് 25 ലക്ഷം ധനസഹായം കൈമാറി. തമിഴ്‌നാട് മുഖ്യമന്ത്രിയുടെ ദുരിതാശ്വാസ നിധിയിലേക്കാണ് 25 ലക്ഷം രൂപ അജിത് സംഭാവന ചെയ്തത്.
കോവിഡ് പ്രതിരോധ പ്രവർത്തനങ്ങളിൽ എല്ലാവരുടെയും പിന്തുണ വേണമെന്നും സർക്കാറിന്റെ ദുരിതാശ്വാസനിധിയിലേക്ക് സംഭാവനകൾ നൽകണമെന്നും തമിഴ്‌നാട് മുഖ്യമന്ത്രി എംകെ സ്റ്റാലിൻ കഴിഞ്ഞ ദിവസം അഭ്യർഥിച്ചിരുന്നു. ഇതിന് പിന്തുണ പ്രഖ്യാപിച്ചാണ് അജിത് ദുരിതാശ്വാസനിധിയിലേക്ക് സംഭാവന നൽകിയതെന്ന് അദ്ദേഹത്തിന്റെ മാനേജർ സുരേഷ് ചന്ദ്ര ട്വിറ്ററിലൂടെ അറിയിച്ചു.
കഴിഞ്ഞ ദിവസം മാത്രം 30000ത്തിലധികം കോവിഡ് കേസുകളും മുന്നൂറിനടത്ത് മരണങ്ങളുമാണ് തമിഴ്‌നാട്ടിൽ റിപ്പോർട്ട് ചെയ്തത്. രാജ്യത്ത് തന്നെ ഏറ്റവുമധികം കോവിഡ് റിപ്പോർട്ട് ചെയ്യപ്പെടുന്ന സംസ്ഥാനങ്ങളിലൊന്നാണ് തമിഴ്‌നാട്.
അതേസമയം, തമിഴ്‌നാട്ടിലെ കോവിഡ് സംബന്ധിച്ച കണക്കുകൾ പുറത്തുവരുന്നില്ലെന്നും മരണം കൃത്യമായി രേഖപ്പെടുത്തുന്നില്ലെന്നും ആരോപണങ്ങളുമുണ്ട്.