ന്യൂഡല്‍ഹി: രാജ്യത്തെ എല്ലാ വിദ്യാര്‍ഥികളെയും പശു ശാസ്ത്ര പരീക്ഷയെഴുതാന്‍ പ്രോത്സാഹിപ്പിക്കണമെന്ന് സര്‍വകലാശാലകളോട് നിര്‍ദേശിച്ച് യുജിസി. ഈ മാസം അവസാനം പരീക്ഷ നടത്താനാണ് ആവശ്യം.
ഒരു വ്യക്തിക്ക് കൗ സയന്‍സ് അഥവാ പശു ശാസ്ത്രത്തില്‍ എത്ര വൈദഗ്ധ്യമുണ്ടെന്ന് ടെസ്റ്റ് ചെയ്യുന്നതിനുള്ള ‘കാമധേനു ഗോ വിഗ്യാന്‍ പ്രചാര്‍ – പ്രസാര്‍ പരീക്ഷ’ വിദ്യാര്‍ഥികളെകൊണ്ട് എഴുതിക്കാനാണ് യൂനിവേഴ്‌സിറ്റി വൈസ് ചാന്‍സലര്‍മാര്‍ക്കെഴുതിയ സര്‍ക്കുലറില്‍ യുജിസി ആവശ്യപ്പെട്ടിരിക്കുന്നത്. യുജിസി സെക്രട്ടറി രജനിഷ് ജെയിന്‍ ഒപ്പിട്ട സര്‍ക്കുലറില്‍ അഫിലിയേറ്റഡ് കോളേജുകളെ ഇതേക്കുറിച്ച് അറിയിക്കാനും വിസികളോട് ആവശ്യപ്പെടുന്നു.
ഇന്ത്യയിലെ തദ്ദേശീയ പശുക്കളുടെ സാമ്പത്തിക, ശാസ്ത്രീയ, പാരിസ്ഥിതിക, ആരോഗ്യ, കാര്‍ഷിക, ആത്മീയ പ്രസക്തി എന്നിവയെക്കുറിച്ചുള്ള വിവരങ്ങള്‍ പ്രചരിപ്പിക്കുന്നതിനായി മത്സ്യബന്ധന, മൃഗസംരക്ഷണ, ക്ഷീരോല്‍പാദന മന്ത്രാലയത്തിന് കീഴില്‍ രൂപീകരിച്ച രാഷ്ട്രീയ കാമധേനു ആയോഗാണ് (ആര്‍കെഎ)പരീക്ഷ നടത്തുന്നത്.
പ്രൈമറി, സെക്കന്‍ഡറി, സീനിയര്‍ സെക്കന്‍ഡറി സ്‌കൂള്‍ വിദ്യാര്‍ത്ഥികള്‍ക്കും കോളേജുകളിലും സര്‍വകലാശാലകളിലും ഉള്ളവര്‍ക്കും ഓണ്‍ലൈന്‍ പരീക്ഷയെഴുതാം. കൂടാതെ ഇന്ത്യയിലെ എല്ലാ പൗരന്മാര്‍ക്കും എഴുതാനുള്ള സൗകര്യമുണ്ട്. പരീക്ഷ എഴുതുന്ന എല്ലാവര്‍ക്കും സര്‍ട്ടിഫിക്കറ്റ് നല്‍കും, സര്‍ക്കുലറില്‍ പറയുന്നു.
‘ചെറുപ്പക്കാരായ വിദ്യാര്‍ത്ഥികള്‍ക്കും മറ്റെല്ലാ പൗരന്മാര്‍ക്കുമിടയില്‍ തദ്ദേശീയ പശുക്കളെക്കുറിച്ച് അവബോധം വളര്‍ത്തുന്നതിനായി വര്‍ഷത്തില്‍ ഒരു പരീക്ഷ എന്ന നിലയിലാണ് പശു ശാസ്ത്ര പരീക്ഷ നടത്തുകയെന്ന് ആര്‍കെഎ ചെയര്‍മാന്‍ വല്ലഭായ് കതിരിയ പറഞ്ഞു.
പശുവിന്റെ ഗുണങ്ങളുമായി ബന്ധപ്പെട്ടുള്ളവയാണ് പരീക്ഷയ്ക്കുള്ള സ്റ്റഡി മെറ്റീരിയലുകള്‍. ആണവ വികിരണങ്ങളില്‍ നിന്നും രക്ഷപ്പെടാന്‍ ചാണകം കവചമായി ഉപയോഗിക്കാം. ഭോപ്പാലില്‍ അണുവികിരണം ഉണ്ടായപ്പോള്‍ ചാണകം ഉപയോഗിച്ചതുകൊണ്ടാണ് നിരവധിയാളുകള്‍ രക്ഷപ്പെട്ടതെന്നും സ്റ്റഡി മെറ്റീരിയല്‍ പറയുന്നു.
പ്രാദേശികമായ പശു ഇനങ്ങളുടെ പാല്‍ മഞ്ഞയായി കാണുന്നത് അതില്‍ സ്വര്‍ണമുള്ളതിനാലാണ്. ഭൂകമ്പം ഉണ്ടാകുന്നത് പശുക്കളെ കൊല്ലുന്നതുകൊണ്ടാണെന്നും സ്റ്റഡി മെറ്റീരിയലില്‍ പറയുന്നു.