ഉദയ്പൂര്‍: ‘ആഢംബരത്തിന്റെ അവസാനവാക്കായി മാറിയിരിക്കുകയാണ്’ മുകേഷ് അംബാനിയുടെ മകള്‍ ഇഷാ അംബാനിയുടെ വിവാഹ ചടങ്ങ്. എഴുന്നൂറ് കോടിയിലധികമാണ് അംബാനി മകളുടെ വിവാഹത്തിനായി ഒഴുക്കിയത്. വമ്പന്‍ താരനിര അണിനിരന്ന വിവാഹത്തില്‍ പ്രശസ്ത പോപ് ഗായിക ബയേണ്‍സയുടെ സംഗീത വിരുന്നും ഉണ്ട്.
ബയേണ്‍സ ലോകത്തു തന്നെ ഏറ്റവും കൂടുതല്‍ പ്രതിഫലം കൈപ്പറ്റുന്ന ഗായികമാരില്‍ ഒരാളാണ്. ബയേണ്‍സയെ ഇന്ത്യയിലെത്തിക്കാന്‍ അംബാനി ഒഴുക്കിയ കോടികളുടെ കണക്കുകേട്ട് ഞെട്ടിയിരിക്കുകയാണ് ലോകം. നാല് മില്യണ്‍ ഡോളറാണ് ഒരു സ്വകാര്യ പരിപാടിയില്‍ പങ്കെടുത്താല്‍ ബയേണ്‍സയുടെ പ്രതിഫലം. അതായത് ഇന്ത്യന്‍ കറന്‍സി 28 കോടിയോളം രൂപ. ടൈം മാഗസിന്റെ റിപ്പോര്‍ട്ടു പ്രകാരം മൂന്ന് മില്യണ്‍ ഡോളറാണ് ബയേണ്‍സയുടെ പ്രതിഫലം. അതേസമയം, നാലുമില്യണാണു പ്രതിഫലമെന്നാണു ബയേണ്‍സയുടെ ആരാധകരും അടുത്തവൃത്തങ്ങളും പറയുന്നത്.
2017ലെ കണക്കു പ്രകാരം ഏറ്റവും കൂടുതല്‍ പ്രതിഫലം വാങ്ങുന്ന ഗായികയാണ് ബയേണ്‍സ. 105 മില്യണ്‍ ഡോളറാണ് സമ്പാദ്യം. ജെന്നിഫര്‍ ലോപ്പസിനോളം തന്നെ വിലയുള്ള ഗായികയാണ് ബയേണ്‍സ. ഏഴുമില്യണ്‍ ഡോളറാണ് ഒരു പരിപാടിക്ക് ജന്നിഫര്‍ ലൂപ്പസിന്റെ പ്രതിഫലമെന്നാണു റിപ്പോര്‍ട്ടുകള്‍ വ്യക്തമാക്കുന്നത്. ലോക സംഗീതത്തില്‍ ഏറ്റവും ഡിമാന്റുള്ള ഗായികമാരാണു ജെന്നിഫര്‍ ലൂപ്പസും ബയേണ്‍സയും.
ഷാരുഖ് ഖാന്‍, സല്‍മാന്‍ ഖാന്‍, കത്രീന കെയ്ഫ്, രണ്‍വീര്‍ സിങ്, ഐശ്വര്യ റോയ്, ദിപിക പദുക്കോണ്‍, സച്ചിന്‍ തെന്‍ഡുല്‍ക്കര്‍, ഹിലാരി ക്ലിന്റന്‍ എന്നിങ്ങനെ ഇന്ത്യയ്ക്ക് അകത്തു നിന്നും പുറത്തു നിന്നുമായി നിരവധി പ്രമുഖരാണ് ഇഷയുടെ വിവാഹ പാര്‍ട്ടിക്കായി എത്തിയത്.
ബാല്യകാല സുഹൃത്തും വ്യവസായി അജയ് പിരമാളിന്റെ മകനുമായ ആനന്ദ് പിരമാളിനെയാണ് ഇഷ വിവാഹം ചെയ്തത്. മുകേഷ് അംബാനി മകളുടെ വിവാഹത്തിനു ചിലവഴിച്ചത് 100 മില്യണ്‍ ഡോളറാണെന്നു ബ്ലൂംബര്‍ഗ് റിപ്പോര്‍ട്ട് ചെയ്തിരുന്നു.