ന്യൂഡല്‍ഹി: കര്‍ഷക പ്രക്ഷോഭത്തില്‍ പങ്കെടുത്ത് മടങ്ങിയ കര്‍ഷകര്‍ വാഹനാപകടത്തില്‍ മരിച്ചു. അജ്ഞാത വാഹനം ഇടിച്ച് കര്‍ഷകര്‍ സഞ്ചരിച്ചിരുന്ന ട്രാക്ടര്‍ മറിഞ്ഞാണ് അപകടമുണ്ടായത്.
പഞ്ചാബ്-പാട്യാല ജില്ലയിലെ സഫേര ഗ്രാമവാസികളായ ഗുര്‍പ്രീത് സിങ് (24), ലാബ് സിങ് (65) എന്നിവരാണ് മരിച്ചത്. പരിക്കേറ്റ മൂന്നു കര്‍ഷകരെ ആശുപത്രിയില്‍ പ്രവേശിപ്പിച്ചിരിക്കുകയാണ്. ഡല്‍ഹി ഛണ്ഡീഗഡ് ദേശീയപാതയില്‍ ഹരിയാനയിലെ കര്‍ണാര്‍ ജില്ലയില്‍ കടന്നുപോകവെയാണ് അപകടം ഉണ്ടായത്.
പുലര്‍ച്ചെ രണ്ടുമണിയോടെയാണ് അപകടം നടന്നതെന്ന് പോലീസ് പറഞ്ഞു. അജ്ഞാത വാഹനം ഇടിച്ചതിനെ തുടര്‍ന്ന് ട്രാക്ടര്‍ മറിയുകയായിരുന്നു. ഗുര്‍പ്രീത് സംഭവ സ്ഥലത്തുതന്നെ മരിച്ചു. ലാബ് സിങ് ആശുപത്രിയിലേക്ക് കൊണ്ടുപോകും വഴിയാണ് മരിച്ചത്.
മൃതദേഹം പോസ്റ്റുമോട്ടത്തിനായി ആശുപത്രിയിലേക്ക് മാറ്റി. പരിക്കേറ്റവരുടെ മൊഴി രേഖപ്പെടുത്തിയതായും അജ്ഞാത വാഹനത്തിലെ ഡ്രൈവര്‍ക്കെതിരെ കേസെടുത്തതായും പോലീസ് അറിയിച്ചു.
Discussion about this post