ന്യൂഡല്‍ഹി: സുഹൃത്തുക്കള്‍ തമ്മിലുള്ള വഴക്ക് തീര്‍ക്കാന്‍ ശ്രമിക്കുന്നതിനിടെ കുത്തേറ്റ് യുവാവിന് ദാരുണാന്ത്യം. ഡല്‍ഹിയിലാണ് സംഭവം. നീരജ് എന്ന യുവാവാണ് മരിച്ചത്. ഇയാള്‍ക്ക് 22 തവണയാണ് കുത്തേറ്റത്. സംഭവത്തില്‍ നീരജിന്റെ സുഹൃത്തുക്കളായ മുകേഷ്, രാകേഷ് എന്നിവര്‍ക്കും പരിക്കേറ്റു. ഡല്‍ഹിയിലെ സഫ്ദര്‍ജങ് ആശുപത്രിയിലെ സെക്യൂരിറ്റി ജീവനക്കാരാണ് ഇവര്‍.
സംഭവത്തെ കുറിച്ച് പോലീസ് പറയുന്നത് ഇങ്ങനെ, കൃഷ്ണന്‍, രവി എന്നിവര്‍ ആശുപത്രിയിലെ സെക്യൂരിറ്റി ജീവനക്കാരായിരുന്നു. കോണ്‍ട്രാക്ട് ജീവനക്കാരായ ഇരുവരെയും ജോലിയില്‍ നിന്ന് പിരിച്ചുവിട്ടു. പകരം മുകേഷിനും രാകേഷിനും ജോലി നല്‍കി. ഇതുമായി ബന്ധപ്പെട്ട തര്‍ക്കമാണ് കൊലപാതകത്തില്‍ കലാശിച്ചത്.
ബുധനാഴ്ച ജോലി കഴിഞ്ഞ് മുകേഷും രാകേഷും മടങ്ങുന്ന സമയത്താണ് സംഭവമുണ്ടായത്. ഇവര്‍ക്കൊപ്പം നീരജും ഉണ്ടായിരുന്നു. ഈ സമയത്ത് കൃഷ്ണനും രവിയും പ്രായപൂര്‍ത്തിയാകാത്ത മറ്റൊരാളും ചേര്‍ന്ന് ഇവരുമായി തര്‍ക്കത്തിലായി. മുകേഷിനെയും രാകേഷിനെയും ആക്രമിക്കുന്ന സമയത്ത് തടയാന്‍ ചെന്ന നീരജിനെ കൃഷ്ണനും രവിയും ചേര്‍ന്ന് കുത്തുകയായിരുന്നു. ഇരുവര്‍ക്കുമെതിരെ കൊലപാതകക്കുറ്റം ചുമത്തി കേസ് എടുത്തിട്ടുണ്ടെന്നാണ് ഡെപ്യൂട്ടി കമ്മീഷണര്‍ ഇംഗിത് പ്രതാപ് സിംഗ് പറഞ്ഞത്.