ന്യൂഡല്‍ഹി: മന്ത്രിയുടെ അത്താഴവിരുന്നിനുള്ള ക്ഷണം നിരസിച്ചതിനെ തുടര്‍ന്ന് വിദ്യ ബാലന്‍ ചിത്രത്തിന്റെ ഷൂട്ടിങ് തടഞ്ഞതായി ആരോപണം. താരത്തിന്റെ ‘ഷേര്‍ണി’ എന്ന ചിത്രത്തിന്റെ ഷൂട്ടിംഗ് ആണ് തടഞ്ഞതെന്നാണ് വിവരം. മധ്യപ്രദേശിലാണ് ഷൂട്ടിംഗ് നടക്കുന്നത്.
വനമേഖലയിലെ ചിത്രീകരണത്തിനായി കഴിഞ്ഞ കുറച്ച് നാളുകളായി വിദ്യാ ബാലന്‍ മധ്യപ്രദേശിലുണ്ട്. ഇതിനിടയിലാണ് മധ്യപ്രദേശ് പ്രവാസികാര്യമന്ത്രി വിജയ് ഷാ, വിദ്യാ ബാലനെ അത്താഴ വിരുന്നിനു ക്ഷണിച്ചത്. എന്നാല്‍ മന്ത്രിയുടെ ക്ഷണം താരം നിരസിക്കുകയായിരുന്നു.
തൊട്ടടുത്ത ദിവസം തന്നെ വനമേഖലയിലേക്കു ഷൂട്ടിങ്ങിനായി പോയ സിനിമാസംഘത്തിന്റെ വാഹനങ്ങള്‍ വനംവകുപ്പ് തടയുകയായിരുന്നു. രണ്ടു വാഹനങ്ങള്‍ മാത്രമേ അനുവദിക്കാനാവുകയുള്ളുവെന്ന് ഡിഎഫ്ഒ അറിയിച്ചതോടെ ഷൂട്ടിംഗ് പാതിവഴിയില്‍ മുടങ്ങുകയായിരുന്നു.
എന്നാല്‍ ഇതേ സംബന്ധിച്ച ആരോപണം മന്ത്രി നിഷേധിച്ചു. താനാണ് വിദ്യയുടെ ക്ഷണം നിരസിച്ചതെന്നും മന്ത്രി പറഞ്ഞു. മഹാരാഷ്ട്രയില്‍ വച്ച് കാണാമെന്ന് അറിയിച്ചിരുന്നുവെന്നും മന്ത്രി പ്രതികരിക്കുന്നു.