മുംബൈ: ബോളിവുഡ് താരം ഊര്‍മിള മാംതോഡ്കര്‍ ശിവസേനയില്‍ ചേര്‍ന്നു. മഹാരാഷ്ട്ര മുഖ്യമന്ത്രി ഉദ്ധവ് താക്കറെയുടെ സാന്നിധ്യത്തിലാണ് ഊര്‍മിള, ശിവസേന അംഗത്വമെടുത്തത്. നിയമസഭാ കൗണ്‍സിലിലേക്ക് ശിവസേന ഊര്‍മിളയെ നാമനിര്‍ദേശം ചെയ്തിട്ടുണ്ട്. ഇക്കാര്യത്തില്‍ ഗവര്‍ണറുടെ തീരുമാനം വരാനിരിക്കുന്നതേയുള്ളൂ.
ഒരിടവേളക്കു ശേഷമാണ് ഊര്‍മിള വീണ്ടും സജീവരാഷ്ട്രീയത്തിലേക്ക് എത്തുന്നത്.കഴിഞ്ഞ വര്‍ഷം മാര്‍ച്ച് 27ന് ഊര്‍മിള കോണ്‍ഗ്രസ് അംഗത്വം സ്വീകരിച്ചിരുന്നു. ഇതിന് പിന്നാലെ ലോക്‌സഭാ തെരഞ്ഞെടുപ്പില്‍ നോര്‍ത്ത് മുംബൈയില്‍ നിന്നും ഊര്‍മിള മത്സരിച്ചു. എന്നാല്‍ ബിജെപിയുടെ മുതിര്‍ന്ന നേതാവ് ഗോപാല്‍ ഷെട്ടിയോട് ഊര്‍മിള തോറ്റിരുന്നു. പരാജയപ്പെട്ടിതിനു ശേഷം ഊര്‍മിള രാഷ്ട്രീയം വിട്ടിരുന്നു.
കോണ്‍ഗ്രസിലെ ഗ്രൂപ്പ് വഴക്കിനെ വിമര്‍ശിച്ചാണ് അവര്‍ പാര്‍ട്ടിയില്‍ നിന്ന് രാജിവെച്ചത്. പാര്‍ട്ടിയില്‍ ചേര്‍ന്ന് 167 ദിവസത്തിനകമാണ് ഊര്‍മിള കോണ്‍ഗ്രസ്ര് അംഗത്വം രാജിവച്ചത്. അതേസമയം ശിവസേന അവരെ പാര്‍ട്ടി വക്താവായി നിയമിച്ചേക്കുമെന്നാണ് റിപ്പോര്‍ട്ടുകള്‍.
Discussion about this post