മുംബൈ: മുംബൈയില്‍ ലിഫ്റ്റിന്റെ ഗ്രില്ലിനും വാതിലിനുമിടയില്‍ ഞെരിഞ്ഞമര്‍ന്ന് അഞ്ച് വയസുകാരന് ദാരുണാന്ത്യം. അഞ്ച് വയസുകാരന് ഹൊസെഫ ഷെയ്ഖ് ആണ് മരിച്ചത്. മുംബൈയിലെ ധാരാവിയിലാണ് അപകടം.
ധാരാവിയിലെ ഷാഹു നഗര്‍ പ്രദേശത്തുള്ള കെട്ടിടത്തിന്റെ നാലാം നിലയിലാണ് ഹൊസെഫയുടെ വീട്. ശനിയാഴ്ച ഉച്ചയോടെ കെട്ടിടത്തിന്റെ താഴെ നിന്ന് സഹോദരിമാര്‍ക്കൊപ്പം ലിഫ്റ്റില്‍ കയറി നാലാം നിലയിലേക്കുള്ള വീട്ടിലേക്ക് പോകവേയാണ് ഹൊസെഫയ്ക്ക് അപകടം സംഭവിച്ചത്. ലിഫ്റ്റ് നാലാം നിലയിലെത്തിയപ്പോള്‍ മൂവരും പുറത്തേക്കിറങ്ങാന്‍ ശ്രമിക്കുകയായിരുന്നു.
സഹോദരിമാര്‍ രണ്ട് പേരും പുറത്തേക്ക് ഇറങ്ങിയെങ്കിലും ഹൊസെഫക്ക് ഇറങ്ങാന്‍ കഴിഞ്ഞില്ല. കുട്ടി പുറത്തേക്ക് ഇറങ്ങും മുന്‍പേ ലിഫ്റ്റിന്റെ വാതിലും ഗ്രില്ലും അടയുകയും ലിഫ്റ്റ് താഴേക്ക് നീങ്ങുകയും ചെയ്യുകയായിരുന്നു. ലിഫ്റ്റ് ഷാഫ്റ്റില്‍ നിന്ന് കണ്ടെത്തിയ കുട്ടിയെ ഉടനെ ആശുപത്രിയില്‍ എത്തിച്ചെങ്കിലും മരണം സംഭവിക്കുകയായിരുന്നു.
സംഭവത്തില്‍ പോലീസ് അന്വേഷണം ആരംഭിച്ചു. ലിഫ്റ്റിന് സാങ്കേതിക തകരാറുകള്‍ കണ്ടെത്തിയിട്ടും ശരിയാക്കാന്‍ ശ്രമം നടന്നില്ലെന്ന് തെളിഞ്ഞാല്‍ കേസ് രജിസ്ട്രര്‍ ചെയ്യുമെന്നു പോലീസ് വ്യക്തമാക്കി.കുട്ടി ലിഫ്റ്റില്‍ കുടുങ്ങുന്നതിന്റെ സിസിടിവി ദൃശ്യങ്ങള്‍ പോലീസിന് ലഭിച്ചിട്ടുണ്ട്.
Discussion about this post