ലഖ്‌നൗ: നിരന്തരമുള്ള ശല്യപ്പെടുത്തല്‍ സഹിക്കാനാവാതെ ഉത്തര്‍പ്രദേശിലെ ജലാവ് ജില്ലാ കോണ്‍ഗ്രസ് അധ്യക്ഷനെ മര്‍ദ്ദിച്ച് സ്ത്രീകള്‍. രണ്ട് സ്ത്രീകള്‍ ചേര്‍ന്ന് അനൂജ് മിശ്രയെ മര്‍ദ്ദിക്കുന്ന ദൃശ്യങ്ങള്‍ ഇപ്പോള്‍ സമൂഹമാധ്യമങ്ങളില്‍ ഒന്നടങ്കം വൈറലായിരിക്കുകയാണ്.
കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധി വദ്രയ്‌ക്കൊപ്പം അനൂജ് മിശ്ര നില്ക്കുന്ന ചിത്രത്തോടൊപ്പമാണ് മര്‍ദ്ദനത്തിന്റെ വീഡിയോ ദൃശ്യം പ്രചരിക്കുന്നത്. ശനിയാഴ്ച ഒറായിലെ റെയില്‍വെ സ്റ്റേഷന്‍ റോഡിലാണ് സംഭവം നടന്നതെന്ന് വാര്‍ത്താ ഏജന്‍സി റിപ്പോര്‍ട്ടുചെയ്തു.
മായ, വര്‍ഷ എന്നിവര്‍ ചേര്‍ന്നാണ് കോണ്‍ഗ്രസ് അധ്യക്ഷന്‍ അനൂജ് മിശ്രയെ തല്ലിച്ചതച്ചത്. കോണ്‍ഗ്രസ് നേതാവ് തങ്ങളെ നിരന്തരം ഫോണില്‍ വിളിക്കുകയും ശല്യപ്പെടുത്തുകയും ചെയ്യുന്നുവെന്ന് മായയും വര്‍ഷയും പറയുന്നു. ഇക്കാര്യം യു.പി കോണ്‍ഗ്രസ് അധ്യക്ഷന്‍ അജയ് കുമാര്‍ ലല്ലുവിനോട് പരാതിപ്പെട്ടുവെങ്കിലും അദ്ദേഹത്തിനെതിരെ യാതൊരു നടപടിയും ഉണ്ടായില്ലെന്നും ഇരുവരും വ്യക്തമാക്കി.
जालौन: छेड़खानी कर रहे @INCUttarPradesh कांग्रेस के जिलाध्यक्ष अनुज मिश्रा की सेवा युवतियों ने चप्पलों से की, उरई के रेलवे स्टेशन का मामला @aap_ka_santosh @Rajlko @navalkant @shalabhmani @ashokmisra2 @tarunkantbjp @Himanshu4bjpup @aadeshShuklaa @Dharmendra_Lko @AjayendraRS pic.twitter.com/B6xXnT77PR
— gyanendra shukla (@gyanu999) November 1, 2020
ഇതോടെ പോലീസില്‍ പരാതിപ്പെട്ടുവെങ്കിലും അവരും നടപടികള്‍ സ്വീകരിച്ചില്ല. മറ്റൊരു പോംവഴിയും മുന്നില്‍ ഇല്ലാത്തതിനാല്‍ മിശ്രയെ വിളിച്ചുവരുത്തി മര്‍ദ്ദിക്കുകയായിരുന്നുവെന്ന് അവര്‍ പറയുന്നു. തങ്ങള്‍ക്ക് മറ്റെന്തുചെയ്യാന്‍ കഴിയുമെന്നും അവര്‍ ചോദിച്ചു.
അതേസമയം ഇത്തരത്തിലൊരു സംഭവം ശ്രദ്ധയില്‍പ്പെട്ടിട്ടില്ലെന്നാണ് ഉത്തര്‍പ്രദേശിലെ കോണ്‍ഗ്രസ് നേതാക്കള്‍ പറയുന്നത്.