മുംബൈ: മഹാരാഷ്ട്രയിലെ രണ്ട് ജില്ലകളില്‍ സ്‌കൂളുകള്‍ തുറന്ന് പ്രവര്‍ത്തനം ആരംഭിച്ചു. ഓരോ ക്ലാസിലും 15 കുട്ടികള്‍ വീതം ഇരുത്തിയാണ് ക്ലാസ് പുനരാരംഭിച്ചത്. മാസ്‌ക് ധരിച്ച് ഒരു ബെഞ്ചില്‍ ഒരു വിദ്യാര്‍ത്ഥി എന്ന നിലയ്ക്കാണ് സ്‌കൂളുകളില്‍ പ്രവര്‍ത്തനം ആരംഭിച്ചത്. ചന്ദ്രപുര്‍, ഗാദ്ചിരോളി ജില്ലകളിലെ വിവിധ വിദ്യാഭ്യാസ സ്ഥാപനങ്ങളിലാണ് ജൂലായ് ആറ് മുതല്‍ ക്ലാസുകള്‍ ആരംഭിച്ചത്.
ഈ ജില്ലകളില്‍ കൊവിഡ് രോഗികളുടെ എണ്ണത്തില്‍ കുറവ് വന്നതോടെ 9,10,12 ക്ലാസുകള്‍ ആരംഭിക്കാനുള്ള വിവിധ മാര്‍ഗനിര്‍ദേശങ്ങള്‍ സംസ്ഥാന വിദ്യാഭ്യാസ വകുപ്പ് ജൂണ്‍ 15 ന് പ്രസിദ്ധീകരിച്ചിരുന്നു. സ്‌കൂളുകള്‍ തുറക്കുന്ന കാര്യം മാനേജ്‌മെന്റ് കമ്മിറ്റികളും പ്രാദേശികഭരണകൂടവും സംയുക്തമായി തീരുമാനിക്കണമെന്ന് വിദ്യാഭ്യാസവകുപ്പ് മാര്‍ഗനിര്‍ദേശങ്ങളില്‍ അറിയിച്ചിരുന്നു.
ജൂലായ് 31 വരെ വിദ്യാഭ്യാസസ്ഥാപനങ്ങള്‍ അടച്ചിടാനുള്ള കേന്ദ്ര ആഭ്യന്തരമന്ത്രാലയത്തിന്റെ ഉത്തരവിനെ മറികടന്നാണ് സ്‌കൂളുകള്‍ തുറന്ന് പ്രവര്‍ത്തിക്കാന്‍ സര്‍ക്കാര്‍ തീരുമാനം എടുത്തത്. മാധേലി ഗ്രാമത്തില്‍ 9, 10, 11 ക്ലാസുകള്‍ മാത്രമാണ് തുടങ്ങിയത്. ദിവസേന മൂന്ന് മണിക്കൂറാണ് ക്ലാസ്. ഇത് അഞ്ച് പിരിയഡായി വിഭജിച്ചിച്ചുണ്ട്. ഉച്ചഭക്ഷണം കഴിക്കാന്‍ ഓരോ വിദ്യാര്‍ത്ഥിയെ മാത്രമായി പുറത്തു വിടുമെന്ന് മാധേലി സ്‌കൂള്‍ പ്രധാന അധ്യാപകന്‍ അറിയിച്ചു.
ആദ്യദിവസം 50 ശതമാനം മാത്രമായിരുന്നു ഹാജരെങ്കിലും അടുത്ത ദിവസങ്ങളില്‍ ഇത് 85 ശതമാനമായി ഉയര്‍ന്നു. ഹാജര്‍ നിര്‍ബന്ധമാക്കിയിട്ടില്ലെങ്കിലും വരുന്ന ആഴ്ചയില്‍ എല്ലാ കുട്ടികളും സ്‌കൂളിലെത്താന്‍ നിര്‍ദേശം നല്‍കിയതായി അധികൃതര്‍ അറിയിച്ചു. അതേസമയം, മാതാപിതാക്കള്‍ക്ക് സ്‌കൂള്‍ കോമ്പൗണ്ടില്‍ പ്രവേശനം അനുവദിച്ചിട്ടില്ല. വിദ്യാര്‍ത്ഥികള്‍ക്ക് സാനിറ്റൈസറുകളും നല്‍കുന്നുണ്ട്.
മറ്റു ക്ലാസുകളിലെ വിദ്യാര്‍ത്ഥികള്‍ക്കായി സാമൂഹിക അകലം പാലിച്ച് തുറന്ന സ്ഥലങ്ങളില്‍ ക്ലാസുകളെടുക്കുന്ന രീതി ആരംഭിക്കാനാണ് നീക്കം. ജൂലായ് ഏഴ് മുതല്‍ ഇത്തരം ക്ലാസുകള്‍ ആരംഭിച്ചതായും 100 ശതമാനം വിദ്യാര്‍ത്ഥികളും ക്ലാസുകളില്‍ എത്തിയതായും ഹെഡ്മാസ്റ്റര്‍ വ്യക്തമാക്കി. ബോറി, ഗല്‍ക്ക, വഡ്ഗാവ്, പാവ്‌നി ജില്ലകളില്‍ എട്ട് വരെയുള്ള വിദ്യാര്‍ത്ഥികള്‍ക്കായി തുറന്ന ക്ലാസുകളും ആരംഭിച്ചു.