ലഖ്‌നൗ: പ്രണയാഭ്യര്‍ത്ഥന നടത്തി ശല്യം ചെയ്ത യുവാവിന്റെ ദേഹത്ത് യുവതി ആസിഡ് ഒഴിച്ചു.
ഉത്തര്‍പ്രദേശിലെ ഉന്നാവിലാണ് സംഭവം. രോഹിത് യാദവ് (24)എന്ന യുവാവാണ് ആസിഡ് ആക്രമണത്തിന് ഇരയായത്. യുവാവിന്റെ ശല്യം സഹിക്കാനാവാതെയാണ് യുവതി ആസിഡ് ഒഴിച്ച് ആക്രമിച്ചതെന്നാണ് പോലീസിന്റെ പ്രാഥമിക നിഗമനം.
ചൊവ്വാഴ്ച രാവിലെയാണ് സംഭവം. ക്ഷീരോല്‍പ്പന വില്‍പ്പനശാലയിലെ ശുചീകരണ തൊഴിലാളിയായ രോഹിത് പലതവണ യുവതിയോട് പ്രണയാഭ്യര്‍ത്ഥന നടത്തിയിരുന്നു. ചൊവ്വാഴ്ച രാവിലെ ക്ഷീരോല്‍പാദന കേന്ദ്രത്തില്‍ ഒളിച്ചിരുന്ന യുവതി രോഹിത് വില്‍പ്പനശാലയിലേക്ക് എത്തിയതോടെ ആസിഡ് ഒഴിച്ച് ആക്രമിക്കുകയായിരുന്നു.
ഗുരുതരമായി പൊള്ളലേറ്റ രോഹിത്തിനെ ഉടന്‍ തന്നെ ആശുപത്രിയിലെത്തിച്ചു. കഴുത്ത്, നെഞ്ച് പുറം, തോള്‍ എന്നീ ശരീരഭാഗങ്ങളില്‍ പൊള്ളലേറ്റ യുവാവിന് ചികിത്സ നല്‍കിക്കൊണ്ടിരിക്കുകയാണെന്ന് ഡോക്ടര്‍മാര്‍ അറിയിച്ചു. അതേസമയം, യുവതിക്കെതിരെ ഇതുവരെയും രോഹിത് പരാതി നല്കിയിട്ടില്ലെന്നാണ് പോലീസ് പറയുന്നത്. പരാതി ലഭിച്ചാല്‍ കേസെടുക്കുമെന്നും പോലീസ് വ്യക്തമാക്കി.
Discussion about this post