റാഞ്ചി: ജാര്‍ഖണ്ഡില്‍ ബിജെപിയെ വെട്ടിലാക്കി എംഎല്‍എ ഡുല്ലു മഹ്തോയ്ക്കെതിരെ മീ ടൂ ആരോപണവുമായി ബിജെപി വനിതാ വിഭാഗം നേതാവ്. പരാതിയില്‍ ഒക്ടോബര്‍ 31ന് എഫ്‌ഐആര്‍ രജിസ്റ്റര്‍ ചെയ്തിട്ടും പോലീസും പാര്‍ട്ടിയും നടപടിയെടുത്തില്ലെന്നും യുവതി പറയുന്നു. നീതി ലഭിക്കാത്ത സാഹചര്യത്തില്‍ യുവതി ആത്മഹത്യയ്ക്കു ശ്രമിച്ചതായും റിപ്പോര്‍ട്ടുണ്ട്.
എംഎല്‍എ അദ്ദേഹത്തിന്റെ ഓഫീസില്‍വെച്ച് തന്റെ കവിളിലും അരയിലും മോശമായി സ്പര്‍ശിക്കുകയും പീഡിപ്പിക്കുകയും ചെയ്തെന്നാണ് യുവതി വീഡോയോയിലൂടെ ആരോപിച്ചത്. വീഡിയോ ജാര്‍ഖണ്ഡ് കോണ്‍ഗ്രസ് സോഷ്യല്‍ മീഡിയ സെല്ലിന്റെ ചാര്‍ജുള്ള മയൂര്‍ ശേഖര്‍ ഝായാണ് പുറത്തുവിട്ടത്.
‘ജാര്‍ഖണ്ഡ് ബിജെപിയിലെ മീ ടൂ മൂവ്മെന്റ്. പാര്‍ട്ടിയുടെ വനിതാ വിങ് നേതാവ് ആത്മാഹുതിക്കു ശ്രമിച്ചു. ഭാഗ്മര എംഎല്‍എ ഡുല്ലു മഹ്തോയ്ക്കെതിരെ ഗുരുതരമായ ലൈംഗിക പീഡന ആരോപണമാണ് അവര്‍ ഉയര്‍ത്തിയത്. മുഖ്യമന്ത്രിയുടെ അടുപ്പക്കാരനായി കണക്കാക്കപ്പെടുന്ന അദ്ദേഹത്തിനുവേണ്ടി ഭരണകൂടത്തിന്റെ മുഴുവന്‍ സംവിധാനങ്ങളും അവളെ നിശബ്ദയാക്കാന്‍ ഒരുങ്ങിയിറങ്ങിയിരിക്കുകയാണ്.’ എന്നാണ് അദ്ദേഹത്തിന്റെ ട്വീറ്റ്.
‘ഇതെന്റെ ആദ്യ മുന്നറിയിപ്പാണ്. എനിക്കു നീതി നല്‍കൂ, ഇല്ലെങ്കില്‍ ഞാന്‍ മുഖ്യമന്ത്രിയുടെ ഓഫീസിലേക്ക് പോകും. എന്റെ മൂന്നാമത്തെ മുന്നറിയിപ്പ് പ്രധാനമന്ത്രിയുടെ ഓഫീസിനു മുന്നിലായിരിക്കും.’ എന്നാണ് വീഡിയോയില്‍ യുവതി പറയുന്നത്.
തനിക്കെതിരെ ഗൂഢാലോചനയുണ്ടെന്നും ആരോപണം വ്യാജമാണെന്നും ചൂണ്ടിക്കാട്ടി ആരോപണങ്ങള്‍ എംഎല്‍എ നിഷേധിച്ചിരിക്കുകയാണ്.