ന്യൂഡല്‍ഹി: രാജ്യതലസ്ഥാനത്ത് ഭീകരര്‍ എത്തിയതായി റിപ്പോര്‍ട്ട്, തുടര്‍ന്ന് സുരക്ഷ ശക്തമാക്കി. ഭീകരര്‍ എന്നു സംശയിക്കുന്ന രണ്ടുപേരുടെ ചിത്രങ്ങള്‍ പോലീസ് പുറത്തുവിടുകയും ചെയ്തു. ഇവരെ കാണുന്നപക്ഷം അറിയിക്കണമെന്ന് ആവശ്യപ്പെട്ട് പഹാട് ഗഞ്ച് പോലീസ് സ്റ്റേഷന്‍ നമ്പറും പോസ്റ്ററില്‍ നല്‍കിയിട്ടുണ്ട്.
ഡല്‍ഹി 360 കിലോമീറ്റര്‍, ഫിറോസ്പുര്‍ ഒന്‍പത് കിലോമീറ്റര്‍ എന്നെഴുതിയ മൈല്‍ക്കുറ്റിക്കു സമീപം നില്‍ക്കുന്ന രണ്ടുപേരുടെ ചിത്രങ്ങളാണ് പുറത്തുവിട്ടത്. പഞ്ചാബിനോട് ചേര്‍ന്ന പാകിസ്താന്‍ അതിര്‍ത്തി പ്രദേശമാണ് ഫിറോസ്പുര്‍. ഫിറോസ്പുര്‍ ഒന്‍പത് കിലോമീറ്റര്‍ എന്ന് ചിത്രത്തില്‍ അടയാളപ്പെടുത്തിയിട്ടുണ്ട്.
കഴിഞ്ഞയാഴ്ച പഞ്ചാബ് പോലീസ് ആറോ ഏഴോ ജയ്‌ഷെ മുഹമ്മദ് ഭീകരര്‍ പഞ്ചാബില്‍നിന്ന് ഡല്‍ഹി ലക്ഷ്യമാക്കി നീങ്ങുന്നുണ്ടെന്ന മുന്നറിയിപ്പ് അധികൃതര്‍ക്ക് നല്‍കിയിരുന്നു. ഇതിന് പിന്നാലെയാണ് ഡല്‍ഹി പോലീസ് ഫോട്ടോ ഉള്‍പ്പെട്ട പോസ്റ്റര്‍ പുറത്തിറക്കിയിരിക്കുന്നത്.