ഭോപ്പാല്‍: ഏഴുവര്‍ഷം പ്രണയിച്ച കാമുകന് സ്വന്തം ഭാര്യയെ വിട്ടുകൊടുത്ത് ഭര്‍ത്താവ്. മധ്യപ്രദേശിലെ ഭോപ്പാലിലാണ് സംഭവം നടന്നത്. ഭോപ്പാല്‍ സ്വദേശിയായ യുവാവ് ആണ് തന്റെ ഭാര്യയെ കാമുകന് വിട്ടു കൊടുത്തത്. വിവാഹമോചനം തേടി കുടുംബ കോടതിയിലെത്തിയതോടെയാണ് സംഭവം പുറംലോകം അറിഞ്ഞത്.
സോഫ്റ്റ്‌വെയര്‍ എഞ്ചിനീയറാണ് യുവാവ്. ഭാര്യ ഫാഷന്‍ ഡിസൈനറുമാണ്. ജീവിതം സന്തോഷകരമായി പോകവെയാണ് യുവതി തന്റെ പഴയ കാമുകന് വിവാഹ ജീവിതം നയിക്കുന്നില്ലെന്ന് അറിഞ്ഞത്. ഇതോടെ യുവതിയുടെ സന്തോഷം നിറഞ്ഞ ജീവിതത്തില്‍ താളപ്പിഴകള്‍ സംഭവിച്ചത്. തന്റെ കാമുകന് ഇപ്പോഴും തന്നെയോര്‍ത്ത് ജീവിക്കുകയാണെന്ന് അറിഞ്ഞതോടെ യുവതി മാനസികമായി തകരുകയും ചെയ്തു.
യുവതിയുടെ അച്ഛന്‍ എതിര്‍ത്തതോടെയാണ് കാമുകനുമായുള്ള ബന്ധം അവസാനിപ്പിക്കേണ്ടി വന്നത്. കാമുകനെ കുറിച്ചുള്ള വാര്‍ത്തകള്‍ അറിഞ്ഞതോടെ ഇരുവരും തമ്മിലുള്ള ബന്ധം വഷളായി. ഭാര്യയുടെ സന്തോഷമെല്ലാം നഷ്ടപ്പെട്ടത് കണ്ടതോടെ യുവാവ് പല തവണ സംസാരിച്ചു നോക്കി. ഫലമില്ലെന്നായതോടെ പിരിയാമെന്ന തീരുമാനത്തിലെത്തിച്ചേരുകയായിരുന്നു.
കുടുംബക്കോടതിയില്‍ കൗണ്‍സിലിങിനിടെ കാമുകനൊപ്പം ജീവിക്കുന്നതാണ് സന്തോഷമെന്ന് യുവതി അറിയിക്കുകയും ചെയ്തു. രണ്ട് മക്കളുടെയും ചുമതല യുവാവിന് കോടതി നല്‍കി. മക്കളെ എപ്പോള്‍ വേണമെങ്കില്‍ വന്ന് കണ്ട് മടങ്ങാമെന്നും യുവാവ് മുന്‍ഭാര്യയ്ക്ക് ഉറപ്പ് നല്‍കുകയും ചെയ്തു.