ഗാന്ധിനഗര്‍: കേന്ദ്ര ആഭ്യന്തര മന്ത്രി അമിത് ഷായെ വാനോളം പുകഴ്ത്തി പ്രമുഖ വ്യവസായി മുകേഷ് അംബാനി. അമിത് ഷാ കര്‍മ്മയോഗിയും രാജ്യത്തിന്റെ യഥാര്‍ത്ഥ ഉരുക്കു മനുഷ്യനുമാണെന്നാണ് റിലയന്‍സ് ഇന്റസ്ട്രീസ് ലിമിറ്റഡ് ചെയര്‍മാനായ മുകേഷ് അംബാനി പറഞ്ഞത്. അമിത് ഷായുടെ മണ്ഡലമായ ഗാന്ധിനഗറില്‍ പണ്ഡിറ്റ് ദീന്‍ദയാല്‍ പെട്രോളിയം സര്‍വ്വകലാശാലയിലെ ബിരുദദാന ചടങ്ങില്‍ സംസാരിക്കുന്നതിനിടെയാണ് നേതാവിനെ വാനോളം പുകഴ്ത്തിയത്.
സര്‍ദാര്‍ വല്ലഭായ് പട്ടേലിനെയാണ് ചരിത്രത്തില്‍ ഉരുക്കു മനുഷ്യന്‍ എന്ന് വിളിക്കുന്നത്. എന്നാല്‍ ചടങ്ങില്‍ അംബാനി ഇത് മാറ്റിക്കുറിക്കുകയായിരുന്നു. ‘അമിത് ഭായ്, നിങ്ങളൊരു യഥാര്‍ത്ഥ കര്‍മ്മയോഗിയാണ്, രാജ്യത്തെ യഥാര്‍ത്ഥ ഉരുക്കുമനുഷ്യനാണ്. ഗുജറാത്തും ഇപ്പോള്‍ ഇന്ത്യയും നിങ്ങളെ പോലൊരു നേതാവിനെ ലഭിച്ച് അനുഗ്രഹീതരായിരിക്കുന്നു.’ മുകേഷ് അംബാനി പറയുന്നു.
ഇന്ത്യയിപ്പോള്‍ സുരക്ഷിത കരങ്ങളിലാണെന്ന് അംബാനി കൂട്ടിച്ചേര്‍ത്തു. നിങ്ങളുടെ ലക്ഷ്യങ്ങള്‍ക്ക് മുന്നിലെ പ്രതിസന്ധികളില്‍ തളരരുതെന്നും വലിയ സ്വപ്നങ്ങള്‍ കാണാന്‍ മടി കാണിക്കരുതെന്നും അംബാനി വ്യക്തമാക്കി.ഇന്ത്യ നാളെ നിങ്ങളുടെ സ്വപ്നങ്ങളും ലക്ഷ്യങ്ങളും പൂര്‍ത്തീകരിക്കാനാവുന്ന അവസരങ്ങള്‍ ഒരുക്കിത്തരുമെന്ന പ്രതീക്ഷ ഒരിക്കലും കൈവിടരുതെന്നും അദ്ദേഹം കൂട്ടിച്ചേര്‍ത്തു.