ന്യൂഡല്‍ഹി: ഇഷ്ടപ്പെട്ട സ്ത്രീയെ തന്നിലേക്ക് ആകര്‍ഷിക്കാന്‍ വേണ്ടി മൂങ്ങയെ കൊന്ന് ആഭിചാര കര്‍മ്മങ്ങള്‍ നടത്തിയ നാല്‍പ്പതുകാരന്‍ പിടിയില്‍. വിവാഹിതനും മൂന്ന് മക്കളുടെ പിതാവുമായ കനയ്യ എന്ന ആളാണ് ഇഷ്ടപ്പെട്ട പെണ്ണിന് തന്നോട് താത്പര്യം തോന്നാന്‍ മൂങ്ങയെ കൊലപ്പെടുത്തി ആഭിചാര കര്‍മ്മങ്ങള്‍ ചെയ്തത്. ഡല്‍ഹിയിലാണ് ഈ സംഭവം നടന്നത്.
മൂങ്ങയെ കൊന്നാല്‍ ആഗ്രഹം സാധിക്കുമെന്നാണ് ഇയാള്‍ വിശ്വസിച്ചിരുന്നത്. മൃഗങ്ങളോടുള്ള ക്രൂരതയുടെ പേരിലാണ് ഇയാളെ പോലീസ് അറസ്റ്റ് ചെയ്തിരിക്കുന്നത്. മൃഗസംരക്ഷണ വകുപ്പിന്റെ നിര്‍ദ്ദേശ പ്രകാരം പോലീസ് കനയ്യുടെ വീട്ടില്‍ നടത്തിയ പരിശോധനയില്‍ കൂളറില്‍നിന്ന് മൂങ്ങയുടെ ശരീരാവശിഷ്ടങ്ങള്‍ കണ്ടെത്തിയിരുന്നു.
ആഭിചാര കര്‍മ്മങ്ങള്‍ നടത്തുന്നതിന്റെ യൂട്യൂബ് വീഡിയോ അറസ്റ്റിലായ കനയ്യ പോലീസിന് കാണിച്ചു കൊടുത്തു. താന്‍ ഇഷ്ടപ്പെട്ട സ്ത്രീ തന്നെയും ഇഷ്ടപ്പെടാന്‍ വേണ്ടിയാണ് ആ വീഡിയോയ്ക്ക് സമാനമായ രീതിയില്‍ പൂജകള്‍ ചെയ്തതെന്നും ഇയാള്‍ പോലീസിന് മൊഴി നല്‍കി.
ആഭിചാര കര്‍മ്മത്തിനായി ആദ്യം കത്തി ഉപയോഗിച്ച് മൂങ്ങയുടെ നഖങ്ങളാണ് ഇയാള്‍ വെട്ടിമാറ്റിയത്. പിന്നീട് ആന്തരികാവയവങ്ങളില്‍ സൂചികള്‍ കുത്തിയിറക്കി. അതേസമയം കനയ്യയ്ക്ക് എങ്ങനെയാണ് മൂങ്ങയെ കിട്ടിയതെന്നും അതിന് എത്ര തുക ഇയാള്‍ മുടക്കിയെന്നതിനെ കുറിച്ചും പോലീസ് അന്വേഷിച്ച് വരികയാണ്.
Discussion about this post