മണ്ണാര്‍ക്കാട്: പാലക്കാട്-കോഴിക്കോട് ദേശീയപാതയില്‍ ചൂരിയോടില്‍ മിനിബസും കാറും കൂട്ടിയിടിച്ച് അപകടം. അപകടത്തില്‍ കാര്‍ യാത്രികനായ യുവാവ് മരിച്ചു. ആറുപേര്‍ക്ക് പരിക്കേറ്റു. മലപ്പുറം താഴേക്കോട് ചുങ്കത്ത് വീട്ടില്‍ മുഷ്‌റഫ് (19) ആണ് മരിച്ചത്. സാരമായി പരിക്കേറ്റ കാര്‍യാത്രികനായ താഴേക്കോട് സ്വദേശി റയാന്‍ (18) എന്ന യുവാവിനെ പെരിന്തല്‍മണ്ണയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
കാര്‍ യാത്രികരെല്ലാം താഴേക്കോട് സ്വദേശികളാണ്. നാലകത്ത് വീട്ടില്‍ സോനു അഹമ്മദ് (20), മാളിയക്കതൊടി അദിനാന്‍ (19), മാളിയക്കതൊടി ജസീം (20), മിനിബസ് യാത്രക്കാരനായ തച്ചമ്പാറ ഒരവില്‍ വീട്ടില്‍ അരുണ്‍ (24), സുധീര്‍ (19) എന്നിവര്‍ക്കാണ് പരിക്കേറ്റത്. ഇവര്‍ വട്ടമ്പലത്തെ സ്വകാര്യ ആശുപത്രിയില്‍ ചികിത്സയിലാണ്.
ചൊവ്വാഴ്ച പുലര്‍ച്ചെ 1.30നാണ് അപകടം. കാഞ്ഞിരപ്പുഴ കാഞ്ഞിരത്ത് വിഷുവേലകഴിഞ്ഞ് മടങ്ങുകയായിരുന്ന കൂട്ടുകാര്‍ സഞ്ചരിച്ചിരുന്ന മിനി ബസും കൊടൈക്കനാലില്‍ യാത്രപോയി തിരിച്ചുവരികയായിരുന്ന താഴേക്കോട് സ്വദേശികളുടെ കാറുമാണ് ചൂരിയോട് പാലത്തിനുസമീപംവച്ച് കൂട്ടിയിടിച്ചത്. നാട്ടുകാര്‍ ചേര്‍ന്നാണ് പരിക്കേറ്റവരെ വട്ടമ്പലത്തെ സ്വകാര്യ ആശുപത്രിയിലെത്തിച്ചത്.