കൊച്ചി: സംവിധായകന് സിദ്ദിഖിന്റെ അപ്രതീക്ഷിത വിയോഗത്തിന്റെ ഞെട്ടലിലാണ് മലയാള സിനിമാലോകം. പ്രിയ സുഹൃത്തിനെ അകാലത്തില് നഷ്ടപ്പെട്ട വേദനയാണ് താരങ്ങളൊക്കെയും പങ്കിടുന്നത്. താരരാജാക്കന്മാരായ മോഹന്ലാലും മമ്മൂട്ടിയും സിദ്ദിഖിന്റെ വിയോഗത്തില് അനുശോചിച്ചിരിക്കുകയാണ്.
സിനിമയിലും ജീവിതത്തിലും സിദ്ദിഖ് തനിക്കൊരു ബിഗ്ബ്രദര് ആയിരുന്നുവെന്ന് മോഹന്ലാല് പറഞ്ഞു. ‘വളരെ പ്രിയപ്പെട്ടവരുടെ തുടരേയുള്ള വേര്പാടുകള്…അതുണ്ടാക്കുന്ന നിസ്സീമമായ വ്യഥ അനുഭവിച്ചുകൊണ്ട് തന്നെ…. എന്നാണ് മമ്മൂട്ടി ഫേസ്ബുക്കില് കുറിച്ചത്.
മോഹന്ലാലിന്റെ കുറിപ്പ്:
‘എന്റെ പ്രിയപ്പെട്ട സിദ്ദിഖിന്റെ വിയോഗം വിശ്വസിക്കാന് കഴിയുന്നില്ല. കഥകളെ സ്വാഭാവിക നര്മ്മത്തിലൂടെയും സാധാരണക്കാരന്റെ ജീവിത സമസ്യകളിലൂടെയും ആവിഷ്കരിച്ച്, ലോകമെമ്പാടുമുള്ള മലയാളികള്ക്ക് പ്രിയപ്പെട്ടവനായി തീര്ന്ന സിദ്ദിഖ്, അകാലത്തില് നമ്മെ വിട്ടുപിരിഞ്ഞതിലുള്ള വിഷമം പറഞ്ഞറിയിക്കാന് വയ്യ. വിഷയങ്ങളിലെ വൈവിദ്ധ്യവും സംവിധാനത്തിലെ ആകര്ഷണീയതയും കാരണം സിദ്ദിഖിന്റെ ഓരോ സിനിമയ്ക്കും വേണ്ടി പ്രേക്ഷകലക്ഷങ്ങള് കാത്തിരുന്നു.
സിദ്ദിഖ് നമ്മളെ ഒരുപാട് ചിരിപ്പിച്ചു, കണ്ണ് നനയിപ്പിച്ചു, പ്രതീക്ഷകള് നഷ്ടപ്പെടുത്തരുതെന്ന് ഓര്മ്മിപ്പിച്ചു, ഉയരങ്ങളില് എത്തിപ്പെടാന് സ്വന്തം ജീവിതത്തിലൂടെ മാതൃക കാണിച്ചു. വാക്കുകളിലും പെരുമാറ്റത്തിലും സൗമ്യത പുലര്ത്തി, ആരോടും ശത്രുത കാണിക്കാതെ, ആഡംബരങ്ങളില് നിന്ന് ഒഴിഞ്ഞുമാറി ഒരു സാധാരണ മനുഷ്യനായി സിദ്ദിഖ് ജീവിച്ചു.
അദ്ദേഹം അസിസ്റ്റന്റ് ഡയറക്ടറായി പ്രവര്ത്തിച്ച ആദ്യചിത്രം നോക്കെത്താ ദൂരത്ത് കണ്ണുംനട്ട് മുതല് അവസാനചിത്രമായ ബിഗ്ബ്രദറില് വരെ അഭിനയിക്കാന് എനിക്ക് ഭാഗ്യം ലഭിച്ചു. സിനിമയിലും ജീവിതത്തിലും അക്ഷരാര്ഥത്തില് എനിക്ക് ഒരു ബിഗ്ബ്രദര് തന്നെയായിരുന്നു സിദ്ദിഖ്. വേദനയോടെ ആദരാഞ്ജലികള്.
സംവിധായകന് സിദ്ദിഖിന്റെ വിയോഗത്തില് അനുശോചനം അറിയിച്ച് നടന് മമ്മൂട്ടി. ‘വളരെ പ്രിയപ്പെട്ടവരുടെ തുടരേയുള്ള വേര്പാടുകള്…അതുണ്ടാക്കുന്ന നിസ്സീമമായ വ്യഥ അനുഭവിച്ചുകൊണ്ട് തന്നെ….സ്വന്തം സിദ്ദിഖിന് ആദരാഞ്ജലി’, എന്നാണ് മമ്മൂട്ടി ഫേസ്ബുക്കില് കുറിച്ചു.
മലയാള സിനിമയിലെ ഹാസ്യത്തിന് വേറിട്ട ശൈലി സമ്മാനിച്ച ഹിറ്റ് സംവിധായകനാണ് സിദ്ദിഖ്. ചൊവ്വാഴ്ച രാത്രിയാണ് സിദ്ദിഖ് ലോകത്തോട് വിടപറഞ്ഞത്. കൊച്ചി അമൃത ആശുപത്രിയില് തീവ്രപരിചരണ വിഭാഗത്തില് ചികിത്സയിലായിരുന്നു. കരള് സംബന്ധമായ രോഗത്തെ തുടര്ന്ന് ചികിത്സയ്ക്കായി കഴിഞ്ഞ മാസമാണ് സിദ്ദിഖിനെ ആശുപത്രിയില് പ്രവേശിപ്പിച്ചത്. കഴിഞ്ഞ ദിവസം ന്യുമോണിയ ബാധിച്ചു. ഈ അസുഖങ്ങള് കുറഞ്ഞുവരുന്നതിനിടെ തിങ്കളാഴ്ച മൂന്നുമണിയോടെ ഹൃദയാഘാതം ഉണ്ടായതോടെയാണ് സ്ഥിതി ഗുരുതരമായത്.
Discussion about this post