രാജ്യത്തെ ഒന്നടങ്കം നടുക്കിയ മണിപ്പൂരിലെ ലൈംഗികാതിക്രമ കേസിലെയും കൂട്ടബലാത്സംഗ കേസിലെയും മുഖ്യപ്രതിയായ ഹുയിരേം ഹെറോദാസ് മെയ്‌തേയിയുടെ വീടിന് തീവെച്ച് സ്ത്രീകള്‍. നൂറുകണക്കിന് രോഷാകുലരായ സ്ത്രീകളാണ്
തീപന്തവുമായെത്തി പ്രതിയുടെ വീടിന് തീവെച്ചത്.
ഹുയിരേം ഹെറോദാസ് മെയ്‌തേയിയെ ഇംഫാലിലെ ഗ്രാമത്തില്‍ വെച്ചാണ് അറസ്റ്റ് ചെയ്തത്. ഈ വാര്‍ത്ത അറിഞ്ഞ് മണിക്കൂറുകള്‍ക്കുള്ളിലാണ് ഗ്രാമവാസികളായ സ്ത്രീകള്‍ വീടിന് തീവെച്ചത്. തൗബാല്‍ ജില്ലയിലെ പേച്ചി അവാങ് ലെയ്കായി ഗ്രാമത്തിലാണ് ഇയാളുടെ വീട്.
മെയ് 4 നായിരുന്നു രാജ്യത്തെ ഒന്നടങ്കം നടുക്കിയ സംഭവം.കാങ്പോക്പി ജില്ലയില്‍ അക്രമാസക്തരായ ജനക്കൂട്ടം രണ്ട് കുക്കി സ്ത്രീകളെ ആക്രമിക്കുകയും നഗ്‌നരാക്കി പരേഡ് ചെയ്യുകയുമായിരുന്നു.
സംഭവത്തിന്റെ വീഡിയോ സോഷ്യല്‍മീഡിയയില്‍ ഒന്നടങ്കം വൈറലായിരുന്നു. ഇതിന് പിന്നാലെ നാലുപേരെ പോലീസ് അറസ്റ്റ് ചെയ്തിരുന്നു.