കോട്ടയം: മുന്‍മുഖ്യമന്ത്രി ഉമ്മന്‍ചാണ്ടിയെ വിറപ്പിച്ച് എല്‍ഡിഎഫ് യുവ സ്ഥാനാര്‍ത്ഥി ജെയ്ക് സി തോമസ്. കേരളക്കരയെ അമ്പരപ്പിച്ച പ്രകടനമാണ് മണ്ഡലത്തില്‍ ജെയ്ക് സി തോമസ് കാഴ്ചവെച്ചത്. 2016 ല്‍ 27092 വോട്ടിന് വിജയിച്ച മണ്ഡലത്തില്‍ ഇക്കുറി ഉമ്മന്‍ചാണ്ടിക്ക് കിട്ടിയത് വെറും 8504 വോട്ടിന്റെ ലീഡ് മാത്രമാണ്.
ഉമ്മന് ചാണ്ടി തുടക്കം മുതല്‍ ലീഡ് നിലനിര്‍ത്തി മുന്നോട്ട് പോയി എങ്കിലും വോട്ടെണ്ണല്‍ ഏഴാമത്തെ റൗണ്ടില്‍ എത്തിയപ്പോള്‍ മുന്‍ മുഖ്യമന്ത്രിയുടെ ലീഡ് രണ്ടായിരത്തിലേക്ക് ഇടിഞ്ഞു. ഇതോടെ മണ്ഡലം സിപിഎം തിരിച്ചുപിടിക്കുമോയെന്ന പ്രതീതി ഉയര്‍ന്നുവന്നു. പിന്നീട് പതിയെ ലീഡ് ഉയരുകയായിരുന്നു.
ഉമ്മന്‍ചാണ്ടിക്ക് വലിയ തിരിച്ചടിയായത് മണര്‍കാട് പഞ്ചായത്തിലും പാമ്പാടി പഞ്ചായത്തിലും ജെയ്ക് സി തോമസിന് കിട്ടിയ വോട്ടുകളാണ്. കഴിഞ്ഞ തവണ പാമ്പാടിയില്‍ 3000 ന് മുകളിലായിരുന്നു ഉമ്മന്‍ചാണ്ടിയുടെ ലീഡെങ്കില്‍ ഇക്കുറി 750 വോട്ടിന്റെ ലീഡോടെ ജെയ്ക് ഇവിടെ മുന്നിലെത്തി.
1970 ന് ശേഷം പുതുപ്പള്ളിയില്‍ ഒരിക്കല്‍ പോലും ഉമ്മന്‍ചാണ്ടി തോറ്റിട്ടില്ല. മികച്ച ഭൂരിപക്ഷമായിരുന്നു നേടിയിരുന്നത്. ഇക്കുറി 8504 വോട്ടിന്റെ ലീഡ് മാത്രം നേടിയുള്ള ഉമ്മന്‍ചാണ്ടിയുടെ ജയം നിറംകെട്ട വിജയമായിട്ടാണ് രാഷ്ട്രീയ നിരീക്ഷകര്‍ കാണുന്നത്.