ന്യൂഡല്ഹി: സാഹിത്യ പുരസ്കാരം ‘ജെസിബി’ ബെന്യാമിന്. നോവലായ ‘മുല്ലപ്പൂനിറമുള്ള പകലുകളി’ന്റെ ഇംഗ്ലീഷ് പരിഭാഷയായ ‘ജാസ്മിന് ഡെയ്സാണ് ബെന്യാമിനെ പുരസ്കാരത്തിനര്ഹനാക്കിയത്. ഷഹനാസ് ഹബീബാണ് നോവല് ഇംഗ്ലീഷിലേക്ക് പരിഭാഷപ്പെടുത്തിയത്.
ജെസിബി ലിറ്റററി ഫൗണ്ടേഷന്റെ പ്രഥമ പുരസ്കാരമാണ് ചലച്ചിത്ര സംവിധായിക ദീപ മേത്ത, സംരംഭകനും പണ്ഡിതനുമായ രോഹന് മൂര്ത്തി, നോവലിസ്റ്റും നാടകരചയിതാവുമായ വിവേക് ഷാന്ബാഗ്, പരിഭാഷക ആര്ഷിയ സത്താര്, സാഹിത്യകാരി പ്രിയംവദ നടരാജന് എന്നിവരടങ്ങിയ സമിതി ഇന്നലെ പ്രഖ്യാപിച്ചത്.
രാജ്യത്ത് സാഹിത്യത്തിന് ഏറ്റവും വലിയ പുരസ്കാരത്തുകയുളള സഹിത്യസമ്മാനമാണ് ജെസിബി. 25 ലക്ഷം രൂപയാണ് സമ്മാനത്തുക. അതില് 5 ലക്ഷം രൂപ നോവല് മൊഴിമാറ്റം ചെയ്ത ഷഹനാസ് ഹബീബിന് ലഭിക്കും. യുഎസിലെ മാസച്യുസെറ്റ്സിലുള്ള ബേ പാത്ത് സര്വകലാശാലയില് അധ്യാപികയാണ് ഷഹനാസ് ഹബീബ്.
അറബ് ലോകത്തുണ്ടായ ‘മുല്ലപ്പൂ വിപ്ലവ’ത്തിന്റെ പശ്ചാത്തലത്തില് എഴുതപ്പെട്ട കൃതിയാണ് ‘ജാസ്മിന് ഡെയ്സ്.’ ഇന്ത്യക്കാര് ഇംഗ്ലീഷിലെഴുതിയതോ മറ്റ് ഇന്ത്യന് ഭാഷകളില്നിന്ന് ഇംഗ്ലീഷിലേക്ക് പരിഭാഷപ്പെടുത്തിയതോ ആയ കൃതികളാണ് പുരസ്കാരത്തിന് പരിഗണിച്ചത്.
Discussion about this post