കൊച്ചി; കല്ലട ബസില്‍ യാത്രക്കാര്‍ക്ക് ക്രൂര മര്‍ദ്ദനമേറ്റ സംഭവത്തില്‍ കൂടുതല്‍ വെളിപ്പെടുത്തലുമായി താരങ്ങള്‍ ഉള്‍പ്പെടെയുള്ള പൊതുജനങ്ങള്‍ രംഗത്ത് എത്തി. ഒരുവര്‍ഷം മുമ്പ് കല്ലടയില്‍ നിന്നും തനിക്കും ദുരനുഭവം ഉണ്ടായിട്ടുണ്ടെന്ന വെളിപ്പെടുത്തലുമായി ജോമോള്‍ ജോസഫ്.
നടുറോഡില്‍ അതീവ അപകടകരമായി വാഹനമോടിക്കുകയും, കൈക്കുഞ്ഞുമായി യാത്രചെയ്യുന്ന സ്ത്രീയെ അടക്കം കേട്ടാലറക്കുന്ന തെറിപറയുകയും, അപമാനിക്കുകയും, സ്ത്രീയും കുട്ടിയും അടങ്ങുന്ന കുടുംബത്തെ നടുറോഡില്‍ കയ്യേറ്റം ചെയ്യാനായും ആക്രമിക്കാനായും ശ്രമിക്കുകയും ചെയ്തിട്ടും പോലീസിന്റെ നിലപാട് മോശമായിരുന്നു എന്നും അവര്‍ പറയുന്നു. തന്റെ ഫേസ്ബുക്ക് പോസ്റ്റിലാണ് ഇക്കാര്യങ്ങള്‍ പറഞ്ഞത്.
ഫേസ്ബുക്ക് പോസ്റ്റിന്റെ പൂര്‍ണ്ണ രൂപം
കല്ലടയില്‍ നിന്നും എനിക്കും ദുരനുഭവം ഉണ്ടായിട്ടുണ്ട്..
ഒരുവര്‍ഷം മുമ്പ് വൈകീട്ട് എറണാകുളത്ത് ഞങ്ങള്‍ താമസ്സിക്കുന്ന കുണ്ടന്നൂരില്‍ നിന്നും വൈറ്റില ഗോള്‍ഡ് സൂക്കില്‍ സിനിമക്കായി സ്‌കൂട്ടറില്‍ പോകുകയാരിന്നു ഞാനും മകനും വിനുവും കൂടെ. വിനുവാണ് സ്‌കൂട്ടര്‍ ഓടിച്ചിരുന്നത്, മകന്‍ എന്റെ കൂടെ പിന്നിലും. കുണ്ടന്നൂര്‍ ജംങ്ഷന്‍ കഴിഞ്ഞ പാടെ സുരേഷ് കല്ലടയുടെ ബാംഗ്ലൂര്‍ ബസ് ഇടതുവശത്തെ ട്രാക്കില്‍ നിന്നും പെട്ടന്ന് തന്നെ വലതുവശത്തെ ട്രാക്കിലേക്ക് പിന്നില്‍ നിന്നും ഞങ്ങളെ അതിവേഗതയില്‍ മറികടന്ന് കയറുകയും, സ്‌കൂട്ടറില്‍ ബസിന്റെ പിന്‍ഭാഗം തട്ടുമെന്നായപ്പോള്‍ ഞങ്ങള്‍ സ്‌കൂട്ടര്‍ പെട്ടന്ന് വെട്ടിച്ച് മാറ്റി വലിയൊരു അപകടത്തില്‍ നിന്നും രക്ഷപ്പെട്ടു. വെട്ടിച്ച് മാറ്റാതിരുന്നെങ്കില്‍ ഞങ്ങള്‍ മൂന്നുപേരും ബസിനടിയില്‍ പെട്ടേനെ.
ഞങ്ങള്‍ പേടിച്ച് വിറച്ച് പോയി, പുറകില്‍ വന്ന കാറുകാരൊക്കെ ഇത് കണ്ട് പേടിച്ച അവസ്ഥയിലായിരുന്നു. നിര്‍ത്താതെ പോയ ബസിനെ തൈക്കൂടം ബ്രിഡ്ജിന് തൊട്ടു മുമ്പ് വെച്ച്, ഞങ്ങള്‍ ഫോളോചെയ്ത് എത്തി, ബസിന്റെ ക്യാബിനിലുള്ളത് ഡ്രൈവറും ക്ലീനറും മാത്രം. സ്‌കൂട്ടറില്‍ നിന്ന് തന്നെ ”എന്ത് പണിയാണ് ചേട്ടാ” എന്ന് വിനു ഡ്രൈവറോട് ചോദിക്കുകസും ചെയ്തു, പിന്നെ ക്യാബിനുള്ളില്‍ നിന്നും കേട്ടാലറക്കുന്ന തെറിയുമായാണ് അവര്‍ ഓടുന്ന ബസില്‍ നിന്നും ഞങ്ങളെ നേരിട്ടത്. അവരെ വെറുതേ വിടാതെ, ഞങ്ങള്‍ ബസിന് മുന്നില്‍ സ്‌കൂട്ടര്‍ കയറ്റി പിടിച്ച് ബ്ലോക്കിട്ട് കൊണ്ടുപോയി. സഹായത്തിന് അപകടസാധ്യത നേരിട്ട് കണ്ട കാറുകാരും ഉണ്ടായിരുന്നു. അവര്‍ വൈറ്റിലയിലെ അവരുടെ ഓഫീസിന് മുന്നില്‍ ബസടുപ്പിച്ചു.
ബസ് നിര്‍ത്തിയ പാടെ ക്ലീനര്‍ ചാടിയിറങ്ങി ഞങ്ങളെ തല്ലാനായി വന്നു. വിനുവും, പുറകേ വന്ന കാറുകാരനും, ക്ലീനര്‍ തല്ലാനായി വരുന്നത് കണ്ട നാട്ടുകാരും എല്ലാം കൂടെ ആകെ ബഹളമായി. കല്ലടയുടെ ജോലിക്കാര്‍ ഓഫീസില്‍ നിന്നും ചാടി വന്നു. അപ്പോഴേക്കും കാറുകാരന്‍ വിളിച്ച് പറഞ്ഞത് പ്രകാരം, കണ്‍ട്രോള്‍ റൂമില്‍ നിന്നും, മരട് പോലീസ് സ്റ്റേഷനില്‍ നിന്നും പോലീസ് ജീപ്പും എത്തി. പരാതിയുമായി മുന്നോട്ട പോകാനായി നോക്കിയപ്പോള്‍, ട്രിപ്പ് മുടങ്ങും, യാത്രക്കാരെ ബാധിക്കും, പകരം ജീവനക്കാരില്ല തുടങ്ങിയ മുടന്തന്‍ ന്യായങ്ങള്‍ കല്ലടജീവനക്കാര്‍ പറഞ്ഞത് അനുസരിച്ച് പോലീസ് അവരെ വാഹനവുമായി പോകാന്‍ അനുവദിക്കുകയും, പ്രശ്‌നമുണ്ടാക്കിയ ജീവനക്കാര്‍ തന്നെ ബസ് നിറയെ യാത്രക്കാരുമായി ബാംഗ്ലൂരിലേക്ക് പോകുകയും ചെയ്തു. പോലീസ് അന്ന് പറഞ്ഞത്, നാളെ സ്റ്റേഷനില്‍ വന്ന് പരാതി തരൂ എന്നാണ്.
നടുറോഡില്‍ അതീവ അപകടകരമായി വാഹനമോടിക്കുകയും, കൈക്കുഞ്ഞുമായി യാത്രചെയ്യുന്ന സ്ത്രീയെ അടക്കം കേട്ടാലറക്കുന്ന തെറിപറയുകയും, അപമാനിക്കുകയും, സ്ത്രീയും കുട്ടിയും അടങ്ങുന്ന കുടുംബത്തെ നടുറോഡില്‍ കയ്യേറ്റം ചെയ്യാനായും ആക്രമിക്കാനായും ശ്രമിക്കുകയും ചെയ്തിട്ടും പോലീസിന്റെ നിലപാട് ഇടായിരുന്നു എങ്കില്‍, സുരേഷ് കല്ലട ഗ്രൂപ്പിന് വഴിവിട്ട് പോലീസ് സഹായം കിട്ടുന്നുണ്ട് എന്നത് വ്യക്തമാണ്. കേരളത്തിലെ പ്രധാന നഗരങ്ങളിലെ പോലീസിലെ പല ഉന്നതരുടേയും വഴിവിട്ട സഹായം സുരേഷ് കല്ലട ഗ്രൂപ്പിന് ലഭിക്കാതെ, ഇതൊന്നും കേരളത്തില്‍ നടക്കില്ല എന്നതാണ് വസ്തുത. കൊടുക്കേണ്ടത് കൊടുക്കേണ്ടവര്‍ക്ക് കൊടുത്തുതന്നെയാണ് സുരേഷ് കല്ലട ബസ് സര്‍വ്വീസ് നമ്മുടെ റോഡുകളിലൂടെ കുതിച്ച് പായുന്നത്.