തിരുവനന്തപുരം: വിരല്‍ ഞൊടിച്ചാല്‍ ഇനിയും ധാരാളം നേതാക്കള്‍ ബിജെപിയിലേക്ക് വരുമെന്ന് ബിജെപി സംസ്ഥാന അദ്ധ്യക്ഷന്‍ പിഎസ് ശ്രീധരന്‍പിള്ള. കൂടുതല്‍ പേര്‍ ഇപ്പോള്‍ ബിജെപിയിലേക്ക് വരുന്നുണ്ട്.
കെപിസിസി എക്‌സിക്യൂട്ടീവില്‍പ്പെട്ട മൂന്നുപേര്‍ ഉള്‍പ്പടെയുള്ളവര്‍ വന്നിട്ടുണ്ട്. ആരൊക്കെയാണ് ഇനി വരുന്നതെന്ന് ഇപ്പോള്‍ വെളിപ്പെടുത്താന്‍ കഴിയില്ലെന്നും അദ്ദേഹം പറഞ്ഞു.
കോണ്‍ഗ്രസില്‍ നിന്ന് ടോം വടക്കന്‍ ബിജെപിയിലേക്ക് വരുന്ന കാര്യം ദേശീയ നേതൃത്വം തന്നെ അറിയിച്ചിരുന്നതായും ശ്രീധരന്‍പിള്ള പറഞ്ഞു. തൃശൂരില്‍ ടോം വടക്കന്‍ മത്സരിക്കുന്നത് സംബന്ധിച്ച് തീരുമാനങ്ങളൊന്നും എടുത്തിട്ടില്ലെന്നും അദ്ദേഹം വ്യക്തമാക്കി.
കേരളത്തില്‍ ഇപ്പോള്‍തന്നെ ബിജെപിക്ക് അനുകൂലമായ സാഹചര്യമുണ്ട്. ടോം വടക്കന്‍ വരുന്നതുകൊണ്ടോ വരാതിരുന്നാലോ അതില്‍ മാറ്റമുണ്ടാകില്ലെന്നും ശ്രീധരന്‍പിള്ള കൂട്ടിച്ചേര്‍ത്തു.
പത്തനംതിട്ട സീറ്റുമായി ബന്ധപ്പെട്ട് ബിജെപിയില്‍ യാതൊരു തര്‍ക്കവുമില്ലെന്നും ശ്രീധരന്‍പിള്ള പറഞ്ഞു. കെ സുരേന്ദ്രന്‍ ഉള്‍പ്പെടെയുള്ള നേതാക്കള്‍ മത്സരിക്കുന്നതുമായി ബന്ധപ്പെട്ട് പാര്‍ട്ടി അതിന്റേതായ തീരുമാനങ്ങള്‍ എടുത്തിട്ടുണ്ടെന്നും ശ്രീധരന്‍ പിള്ള വ്യക്തമാക്കി.