തിരുവനന്തപുരം: കേന്ദ്ര ടൂറിസംമന്ത്രി അല്‍ഫോണ്‍സ് കണ്ണന്താനത്തിനെതിരേ നവമാധ്യമങ്ങളില്‍ വ്യാജ പ്രചാരണം നടത്തുകയും അസഭ്യമായ ഭാഷയില്‍ അധിക്ഷേപിക്കുകയും ചെയ്ത സംഭവം പോലീസ് ഹൈടെക് സെല്‍ അന്വേഷിക്കും.
കേന്ദ്രമന്ത്രി നല്‍കിയ പരാതി സംസ്ഥാന പോലീസ് മേധാവി ഹൈടെക് സെല്ലിനു കൈമാറി. പ്രാഥമികാന്വേഷണം നടത്തി നവമാധ്യമങ്ങള്‍ വഴി അധിക്ഷേപിച്ചിട്ടുണ്ടെങ്കില്‍ അവര്‍ക്കെതിരേ നടപടി സ്വീകരിക്കാനാണു നിര്‍ദേശിച്ചിട്ടുള്ളതെന്നു സംസ്ഥാന പോലീസ് മേധാവിയുടെ ഓഫിസ് അറിയിച്ചു.
പുല്‍വാമ ഭീകരാക്രമണത്തില്‍ വീരമൃത്യു വരിച്ച സിആര്‍പിഎഫ് ജവാന്‍ വസന്തകുമാറിന്റെ ശവസംസ്‌കാര ചടങ്ങില്‍ പങ്കെടുത്ത് കണ്ണന്താനം ഫേസ്ബുക്കില്‍ പോസ്റ്റ് ചെയ്ത ചിത്രമാണ് വിവാദമായത്.
ചില നിക്ഷിപ്ത താല്‍പര്യക്കാര്‍ അത് സെല്‍ഫിയാണെന്നു പ്രചാരണം നടത്തുകയും അധിക്ഷേപിക്കുകയും ചെയ്തുവെന്നാണ് മന്ത്രിയുടെ പരാതി.
Discussion about this post