മദ്യം വെള്ളം ഒഴിച്ചു കുടിക്കും, ചിലപ്പോള്‍ സോഡ അല്ലെങ്കില്‍ കരിക്ക് വെള്ളം ഇത്തരത്തിലാണ് പൊതുവെയുള്ള മദ്യപാനങ്ങള്‍. പറയതക്ക വ്യത്യസ്തതകള്‍ ഒന്നും തന്നെ ഇതുവരെ വന്നിട്ടില്ല. എന്നാല്‍ ഇപ്പോള്‍ ഏവരെയും അമ്പരപ്പിക്കുന്ന ഒരു വ്യത്യസ്ത മദ്യപാനം ആണ് ഇന്ന് സമൂഹമാധ്യമങ്ങള്‍ ചര്‍ച്ച ചെയ്യുന്നത്. ആന്റപ്പന്‍ ആണ് വ്യത്യസ്തകള്‍ തേടുന്ന ആള്‍.
റിലീസിന് ഒരുങ്ങുന്ന മാര്‍ഗംകളി എന്ന ചിത്രത്തിലെ ക്യാരക്ടര്‍ ടീസറാണ് ഇത്. ബിബിന്‍ ജോര്‍ജ്, നമിത പ്രമോദ്, ഗൗരി കിഷന്‍ എന്നിവര്‍ പ്രധാന കഥാപാത്രങ്ങളാക്കി, ശ്രീജിത്ത് വിജയന്‍ സംവിധാനം ചെയ്യുന്ന ചിത്രമാണ് മാര്‍ഗംകളി. നടന്‍ ബൈജു ആണ് മദ്യപാനിയായ ആന്റപ്പനെ അവതരിപ്പിക്കുന്നത്. കുടിക്കുന്ന കഞ്ഞിയിലും ഐസ്‌ക്രീം കപ്പിലും ഉള്‍പ്പടെ നിരവധി വഴികളാണ് കുടിക്കുന്നതില്‍ ആന്റപ്പന്‍ കണ്ടെത്തുന്നത്. സംഭവം ഇപ്പോള്‍ തരംഗമായി കഴിഞ്ഞു.
ലിസ്റ്റിന്‍ സ്റ്റീഫന്‍, ആല്‍വിന്‍ ആന്റണി എന്നിവര്‍ ചേര്‍ന്ന് നിര്‍മ്മിക്കുന്ന ചിത്രം കോമഡിയും സസ്‌പെന്‍സും എല്ലാം കൂട്ടിയിണക്കിയ എന്റര്‍ടെയിനറാണെന്നാണ് വിലയിരുത്തല്‍. ശശാങ്കന്‍ മയ്യനാടിന്റേതാണ് തിരക്കഥ. ഡയലോഗുകള്‍ രചിക്കുന്നത് ബിബിന്‍ ജോര്‍ജ് തന്നെ. വലിയൊരു താരനിര തന്നെയുണ്ട് ചിത്രത്തില്‍. സിദ്ദിഖ്, ശാന്തികൃഷ്ണ, ധര്‍മ്മജന്‍ ബൊള്‍ഗാട്ടി, ഹരീഷ് കണാരന്‍, ബിന്ദു പണിക്കര്‍, സുരഭി സന്തോഷ്, സൗമ്യാമേനോന്‍, ബിനു തൃക്കാക്കര തുടങ്ങിയവരും ചിത്രത്തില്‍ വേഷമിടുന്നുണ്ട്.
