ബിജു മേനോന്‍ നായകനായി ഏറ്റവും ഒടുവില്‍ തീയ്യേറ്ററുകളിലെത്തിയ ചിത്രമാണ് ‘സത്യം പറഞ്ഞാ വിശ്വസിക്കുവോ’. ചിത്രത്തിന് ഗംഭീര വരവേല്‍പ്പാണ് സിനിമാ പ്രേമികള്‍ നല്‍കിയത്. വളരെ റിയലിസ്റ്റിക്കായ ചിത്രമാണിതെന്നാണ് പ്രേക്ഷകരുടെ അഭിപ്രായം. ഇപ്പോഴിതാ ചിത്രത്തെ പ്രശംസിച്ച് രംഗത്ത് എത്തിയിരിക്കുകയാണ് നടന്‍ ജോജു ജോര്‍ജ്. ഫേസ്ബുക്ക് ലൈവിലൂടെ ആണ് അദ്ദേഹം ചിത്രത്തെ പ്രശംസിച്ചത്.
‘സത്യം പറഞ്ഞാ വിശ്വസിക്കുവോ നമ്മുടെ ബിജുവേട്ടന്റെ പുതിയ സിനിമ റിലീസ് ചെയ്തു. അദ്ദേഹം വളരെ സന്തോഷത്തിലാണ്. അടിച്ചു ഹിറ്റടിച്ചു. അതില്‍ സുധി കോപ്പയുണ്ട്, നമ്മടെ ചങ്ക് അവന്‍ വളരെ ഗംഭീരമാക്കി. എല്ലാവരും കാണണം. കുറച്ചു ദിവസങ്ങള്‍ക്ക് ശേഷം ആള്‍ക്കാരെ തീയ്യേറ്ററുകളിലേക്ക് എത്തിച്ച സിനിമയാണ്. ഈ ചിത്രം നിങ്ങള്‍ക്ക് ധൈര്യപൂര്‍വം വിശ്വാസപൂര്‍വം തീയ്യേറ്ററില്‍ പോയി കാണാവുന്ന അടിപൊളി പടമാണ്. എല്ലാവരും തീയ്യേറ്ററില്‍ പോയി ചിത്രം കാണുക’ എന്നാണ് ജോജു ഫേസ്ബുക്ക് ലൈവില്‍ പറഞ്ഞത്.
ഒരു വടക്കന്‍ സെല്‍ഫിക്കു ശേഷം ജി പ്രജിത്ത് സംവിധാനം ചെയ്ത ചിത്രത്തില്‍ സംവൃത സുനില്‍ ആണ് നായികയായി എത്തിയത്. അലന്‍സിയര്‍, സൈജു കുറുപ്പ്, സുധി കോപ്പ, സുധീഷ്, ശ്രീകാന്ത് മുരളി, വെട്ടുക്കിളി പ്രകാശ്, വിജയകുമാര്‍, ദിനേശ് പ്രഭാകര്‍, മുസ്തഫ, ബീറ്റോ, ശ്രീലക്ഷ്മി, ശ്രുതി ജയന്‍ തുടങ്ങിയവരാണ് ചിത്രത്തിലെ മറ്റ് താരങ്ങള്‍.
