കേരളത്തെ ഭീതിയിലാഴ്ത്തിയ നിപ്പാ വൈറസും, അതില്‍ നിന്നുള്ള കേരളത്തിന്റെ അതിജീവനവും പശ്ചാത്തലമാക്കി ആഷിഖ് അബു സംവിധാനം ചെയ്ത വൈറസ് തിയ്യേറ്ററുകളില്‍ നിറഞ്ഞോടുകയാണ്. അതിനിടെ ആഷിക് അബു സംവിധാനം ചെയ്യുന്ന അടുത്ത ചിത്രം നവോത്ഥാന നായകന്‍ അയ്യങ്കാളിയെ കുറിച്ചുള്ളതായിരിക്കുമെന്നുള്ള റിപ്പോര്‍ട്ട് വന്നിരുന്നു. ചിത്രത്തില്‍ വിനായകനാകും അയ്യങ്കാളിയുടെ വേഷത്തില്‍ എത്തുക എന്ന വാര്‍ത്തകളും പരന്നിരുന്നു.
എന്നാല്‍ തന്റെ അടുത്ത ചിത്രം അതായിരിക്കില്ല എന്ന് വ്യക്തമാക്കിയിരിക്കുകയാണ് ആഷിഖ് അബു. സൗബിന്‍ ഷാഹിറിനെ കേന്ദ്രകഥാപാത്രമാക്കിയുള്ള ചിത്രമാണ് ആഷിഖ് അബു അടുത്തതായി സംവിധാനം ചെയ്യുന്നത്. ലളിതമായതും തമാശ നിറഞ്ഞതുമായ ഒരു ചിത്രമായിരിക്കും അതെന്ന് ആഷിഖ് അബു വ്യക്തമാക്കി. ന്യൂ ഇന്ത്യന്‍ എക്സ്പ്രസിന് നല്‍കിയ അഭിമുഖത്തിലാണ് ആഷിക് ഇക്കാര്യം വ്യക്തമാക്കിയത്. ഉണ്ണി ആര്‍ ആണ് ചിത്രത്തിന് തിരക്കഥയൊരുക്കുന്നത്. ഈ വര്‍ഷം തന്നെ ചിത്രീകരണം ആരംഭിക്കും.
Discussion about this post