ഷാനവാസ് കെ ബാവക്കുട്ടി സംവിധാനം ചെയ്യുന്ന ഏറ്റവും പുതിയ ചിത്രമായ തൊട്ടപ്പനിലെ മൂന്ന് പുതിയ ക്യാരക്ടര്‍ പോസ്റ്ററുകള്‍ പുറത്തുവന്നു. ചിത്രത്തിലെ നായിക പ്രിയംവദ കൃഷ്ണന്റെ ക്യാരക്ടര്‍ പോസ്റ്ററാണ് ഇന്ന് പുറത്തുവിട്ടത്. മലയാളത്തിലെ പുതുമുഖ നായിക നിമിഷ സജയനാണ് തന്റെ ഫേസ് ബുക്ക് പേജിലൂടെ പോസ്റ്റര്‍ പുറത്തുവിട്ടത്. സാറ എന്ന കഥാപാത്രമായാണ് പ്രിയംവദ കൃഷ്ണന്‍ തൊട്ടപ്പനില്‍ എത്തുന്നത്.
ഇന്നലെ ലാലിന്റെ ക്യാരക്ടര്‍ പോസ്റ്റര്‍ മധുപാല്‍ തന്റെ ഫേസ് ബുക്ക് പേജിലൂടെ പുറത്തുവിട്ടു. അന്ത്രപ്പേര്‍ എന്ന കഥാപാത്രമായാണ് ലാല്‍ എത്തുന്നത്. ‘ഒരുപാട് സന്തോഷത്തോടെ തൊട്ടപ്പന്‍ എന്ന ചിത്രത്തിലെ ഒരു കഥാപാത്രത്തിന്റ രൂപം നിങ്ങളിലേക്കെത്തിക്കുന്നു. ലാലേട്ടന്റെ അന്ത്രപ്പേര്‍ എന്ന കഥാപാത്രം ഈ ചിത്രത്തിലെ ഒരനുഭവമാകും എന്ന പ്രത്യാശയോടെ …. ഷാനവാസിനും തൊട്ടപ്പനും അഭിനന്ദനം…’ എന്നാണ് മധുപാല്‍ പോസ്റ്ററിനോടൊപ്പം കുറിച്ചത്.
മനോജ് കെ ജയന്റേയും ക്യാരക്ടര്‍ പോസ്റ്റര്‍ പുറത്തുവന്നിരുന്നു. പീറ്ററച്ചനായാണ് മനോജ് കെ ജയന്‍ അഭിനയിക്കുന്നത്. ലാല്‍ ജോസാണ് പോസ്റ്റര്‍ പുറത്തുവിട്ടത്. ചിത്രത്തിലെ മറ്റു പോസ്റ്ററുകളും പുറത്തുവന്നിരുന്നു.
ചിത്രത്തിലെ രണ്ട് ഗാനവും പുറത്തുവിട്ടു. ‘മീനേ ചെമ്പുള്ളി മീനേ’ എന്നു തുടങ്ങുന്ന വീഡിയോ ഗാനവും ‘പ്രാന്തന്‍ കണ്ടലിന്‍’ എന്ന ഗാനത്തിന്റെ ലിറിക്കല്‍ വീഡിയോയുമാണ് പുറത്തുവന്നത്.
വിനായകനാണ് തൊട്ടപ്പനിലെ നായകന്‍. പുതുമുഖ നടി പ്രിയംവദയാണ് നായിക. ഫ്രാന്‍സിസ് നൊറോണയുടെ ഇതേ പേരില്‍ പ്രസിദ്ധീകരിച്ച ചെറുകഥയുടെ സ്വതന്ത്രാവിഷ്‌കാരമാണ് ‘തൊട്ടപ്പന്‍’ എന്ന ചിത്രം. ഗ്രാമീണ കൊച്ചിയുടെ സൗന്ദര്യവും സംസ്‌കാരവും ഉള്‍കൊള്ളുന്ന പ്രണയവും ആക്ഷനും ഇഴചേര്‍ത്താണ് ‘തൊട്ടപ്പന്‍’ എന്ന ചിത്രം ഒരുക്കിയിരിക്കുന്നതെന്നാണ് സംവിധായകന്‍ പറഞ്ഞിരിക്കുന്നത്. മനോജ് കെ ജയന്‍, ലാല്‍, ദിലീഷ് പോത്തന്‍, ഇര്‍ഷാദ്, രശ്മി സതീഷ്, സുനിത അജിത്കുമാര്‍, മഞ്ജു പത്രോസ്, പ്രശാന്ത് മുരളി, സിനോജ് വര്‍ഗീസ്, ബിനോയ് നമ്പാല, ശ്രീജ ദാസ്, മനു ജോസ്, ഡാവിഞ്ചി തുടങ്ങിയവരാണ് ചിത്രത്തിലെ മറ്റ് താരങ്ങള്‍. ഈദ് റിലീസായാണ് ചിത്രം എത്തുന്നത്.