ഒരു താരനിശയ്ക്കിടയില്‍ വെച്ച് നടന്ന രസകരമായ ചിത്രം പങ്കുവെച്ചിരിക്കുകയാണ് മലയാളത്തിന്റെ ചോക്‌ളേറ്റ് ഹീറോ കുഞ്ചാക്കോ ബോബന്‍. വേദിയില്‍ മെഗാസ്റ്റാര്‍ മമ്മൂട്ടി എത്തിയപ്പോള്‍ നൈസായി ഒന്ന് പോക്കറ്റടിക്കാന്‍ നോക്കിയെന്ന് പറഞ്ഞാണ് ചാക്കോച്ചന്‍ ചിത്രം ഫേസ്ബുക്കില്‍ പങ്കുവെച്ചത്.
‘പോക്കറ്റടിക്കാന്‍ നോക്കിയ എന്നെ നോക്കി പേടിപ്പിക്കുന്ന മെഗാസ്റ്റാര്‍’ എന്നും ഇത് ഒരു ഫാന്‍ ബോയ് മൊമന്റ് ആണെന്നുമാണ് ചിത്രം പങ്കുവെച്ച് ചാക്കോച്ചന്‍ കുറിച്ചത്. ചിത്രം പോസ്റ്റ് ചെയ്ത് മണിക്കൂറുകള്‍ക്കകം വൈറലായിക്കഴിഞ്ഞു. മുപ്പതിനായിരത്തിലധികം ലൈക്കുകളാണ് ചിത്രത്തിന് ഇതിനകം ലഭിച്ചിരിക്കുന്നത്.
ചിത്രത്തിന് ലഭിച്ചിരിക്കുന്ന കമന്റുകള്‍ ഫോട്ടോയെക്കാള്‍ രസകരമാണ്. മലയാള സിനിമയില്‍ പ്രായം പുറകോട്ട് പോയി കൊണ്ടിരിക്കുന്ന കാര്യത്തില്‍, മമ്മൂക്ക പ്രിന്‍സിപ്പലും ചാക്കോച്ചന്‍ ലക്ചറും ആണെന്ന് ഒരു കമന്റ്. മമ്മൂക്കയുടെ പോക്കറ്റില്‍ നിന്നും കൂളിംഗ് ഗ്ലാസ് അടിച്ചു മാറ്റാനുള്ള പരിപാടിയാണ് ചാക്കോച്ചന്റേതെന്നും, ഗ്ലാമറിന്റെ രഹസ്യ കൂട്ട് കുറിച്ചിട്ട കുറിപ്പ് ഇക്കയുടെ പോക്കറ്റില്‍ നിന്നും ചോക്ലേറ്റ് പയ്യന്‍ കട്ടെടുക്കാന്‍ ശ്രമിക്കുകയാണെന്നുമൊക്കെയാണ് ചിത്രത്തിന് ആരാധകര്‍ നല്‍കിയിരിക്കുന്ന കമന്റുകള്‍.
Discussion about this post