താന്‍ സംവിധാനം നിര്‍വഹിച്ച ചിത്രത്തിന്റെ പോസ്റ്റര്‍ മതിലുകളില്‍ ഒട്ടിക്കുന്ന ഹസീന സുനീറിന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലായിരുന്നു. ഇതിന് പിന്നാലെ ആണ് സംവിധായകയെ അഭിനന്ദിച്ച് നടന്‍ അജു വര്‍ഗീസ് രംഗത്തെത്തിയിരിക്കുന്നത്. ചിത്രത്തിനും ഹസീനയ്ക്കും മുഴുവന്‍ പിന്നണി പ്രവര്‍ത്തകര്‍ക്കും അജു തന്റെ ഫേസ്ബുക്കിലൂടെ അഭിനന്ദനം അറിയിച്ചിട്ടുണ്ട്. ‘പ്രകാശന്റെ മെട്രോ’ എന്നാണ് ചിത്രത്തിന്റെ പേര്.
ഇന്നാണ് ചിത്രം തീയ്യേറ്ററുകളിലെത്തുന്നത്. ദിനേഷ് പ്രഭാകര്‍ ആണ് ചിത്രത്തിലെ നായകന്‍. സംവിധായിക ഹസീന സുനീര്‍ മതിലില്‍ പോസ്റ്റര്‍ ഒട്ടിക്കുന്ന ഫോട്ടോ സോഷ്യല്‍ മീഡിയയില്‍ വൈറലായിരുന്നു. നിരവധി പേരാണ് ഫോട്ടോ ഷെയര്‍ ചെയ്തതിന് അജുവിനെ അഭിനന്ദിച്ച് രംഗത്തെത്തിയത്. ‘ഈ സംവിധായകയും, സ്വന്തം ഫ്‌ലെക്‌സ് കാശ് കൊടുത്ത് വച്ച ബൈജു അണ്ണനും ആണ് കഴിഞ്ഞ മാസ മാസ്സുകള്‍’ എന്നാണ് ചിലര്‍ ഇതിനെ കുറിച്ച് പറഞ്ഞിരിക്കുന്നത്.
ദിനേഷ് പ്രഭാകര്‍ കേന്ദ്രകഥാപാത്രമായെത്തുന്ന ചിത്രം റോഡ് മൂവി വിഭാഗത്തില്‍പ്പെടുന്നതാണ്. ഓട്ടോ ഡ്രൈവറായ പ്രകാശനായിട്ടാണ് ദിനേഷ് ചിത്രത്തിലെത്തുന്നത്. അനഘ ജാനകിയാണ് നായിക.
